Դամասկոսի տարբեր թաղամասերում հրասանդներ են ընկել

Դամասկոսում ապրիլի 21-ին Դար աս Սալամ դպրոցի մոտակայքում և Սալհիեի թաղամասում հրասանդներ ընկնելու հետևանքով 2 քաղաքացի զոհվել է, ևս 36-ը՝ վիրավորվել: Ինչպես հաղորդում է սիրիական ՍԱՆԱ գործակալությունը, ոստիկանությունից հայտնել են, որ բացի այդ հրասանդներ են ընկել Բաբ Թումա թաղամասում, որոնց հետևանքով 2 քաղաքացի զոհվել է, 23-ը՝ վիրավորվել: Հրասանդներևից մեկն ընկել է Բաբ Թումա թաղամասի հրապարակում:

Հրասանդներ են ընկել նաև Զաբլատանի թաղամասի Խազան և Դաուամիա հրապարակներում, ինչպես նաև Դամասկոսի Ջարամանա շրջանի արևմտյան ալ Աս և Քաշքուլ թաղամասերում: Հրասանդները հիմնականում նյութական վնասներ են պատճառել:

Բացի Դամասկոսից, հրթիռներ են ընկել Հոմսի Ում աս Սարջ և Քաֆրնանա գյուղերում, որոնց հետևանքով 3 քաղաքացի զոհվել են, այդ թվում՝ մեկ երեխա: Կան նաև վիրավորներ:

ՄԱԿ-ի տվյալներով` Սիրիայում եռամյա հակամարտության ընթացքում զոհերի թիվը գերազանցել է 130 հազարը: Զոհված հայերի թիվը գերազանցել է 80-ը: