«Չորրորդ ինքնիշխանություն». Բելաջիոյի Գրիշը կհամալրի ԲՀԿ շարքերը

Էրեբունի համայնքի որոշ հատված եւ Շենգավիթ համայնքն ընդգրկող թիվ 11 ընտրատարածքում մեծամասնական ընտրակարգով առաջադրվելու է ՕԵԿ կուսակցությանը վերջերս անդամագրված Էդուարդ Մադաթյանը՝ Խուճուճ Էդոն։ Մադաթյանի որոշումը վերջնական է, եւ անկախ որեւէ հանգամանքից, վերջինս մտնելու է ընտրապայքարի մեջ։ Շրջանառվող խոսակցությունների համաձայն՝ այս ընտրատարածքում մեծամասնականով առաջադրվելոը ցանկություն է հայտնել Գրիգորի Մարգարյանը՝ Բելաջիոյի Գրիշը, որն այս տարածքից 2007 թվականին պատգամավոր էր դարձել իշխող Հանրապետական կուսակցության օգնությամբ եւ «դաբրոյով»։ Ընդգծենք, որ Գրիգորի Մարգարյանը մինչ այժմ անկուսակցական էր։

Ավելացնենք նաեւ, որ «ՉԻ» տեղեկություններով այս ընտրատարծքը «տրվել» է ԲՀԿ–ին, եւ խոսակցություններ կան, որ թիվ 11 ընտրատարածքից մեծամասնականով պատգամավոր է դառնալու հենց ԲՀԿ–ի թեկնածուն։ Մեր աղբյուրների փոխանցմամբ՝ վերջերս Գրիգորի Մարգարյանը բանակցություններ է սկսել ԲՀԿ–ի հետ՝ կուսակցության շարքերը համալրելու ուղղությամբ։ Ամենայն հավանականությամբ Բելաջիոյի Գրիշը կդառնա ԲՀԿ կուսակցության անդամ, եւ նրա հովանավորությամբ էլ կառաջադրվի թիվ 11 ընտրատարածքում։
Երեկ «ՉԻ»–ն փորձեց ԲՀԿ ղեկավար Գագիկ Ծառուկյանի մամլո քարտուղար Խաչիկ Գալստյանից իմանալ, թե ճի՞շտ են շրջանառվող խոսակցություններն այն մասին, որ Գրիգորի Մարգարյանը որոշել, ըստ այդմ՝ դիմել է ԲՀԿ–ին՝ կուսակցական դառնալու համար։ Ի պատասխան՝ Խաչիկ Գալստյանն ասաց, որ ինքն այդ մասին տեղեկություններ չունի։