«Հայկական Ժամանակ». ՄԱՊ-ի Ալիկը կառաջադրվի թիվ 21 ընտրատարածքում

Հանրապետական կուսակցությունը որոշել է Արմավիրի մարզի թիվ 21 ընտրատարածքում առաջադրել ԱԺ գործարար պատգամավոր Ալիկ Պետրոսյանի ՝ ՄԱՊ-ի Ալիկի թեկնածությունը: Այս մասին հայտնում են թերթի լավատեղյակ աղբյուրները:

Նախօրեին թերթը տեղեկացրել էր, որ ՀՀԿ-ն ու ԲՀԿ-ն համաձայնության են եկել թիվ 21 ընտրատարածքի հարցում և որոշել, որ այնտեղ ոչ ԲՀԿ-ական գործող պատգամավոր Ռուստամ Գասպարյանը կառաջադրվի, ոչ էլ ՀՀԿ-ական պատգամավոր Նահապետ Գևորգյանը՝ Նովոն, որին մինչև վերջերս ՀՀԿ-ն մտադիր էր մեծամասնականով առաջադրել այդ ընտրատարածքում: Ռուստամ Գասպարյանը երեկ այդպես էլ ԱԺ չի գնացել, նա արդեն երկու օր է նաև «ՀԺ»-ի թղթակցի զանգերին չի պատասխանում:Իսկ ԲՀԿ նախագահ Գագիկ Ծառուկյանի խոսնակ Խաչիկ Գալստյանը այդպես էլ չի մեկնաբանել վերոնշյալ տեղեկությունները: Փոխարենը, երեկ Ազգային ժողով էր ներկայացել Ալիկ Պետրոսյանը, որն ամիսներով խորհրդարան չի մտնում: Բայց նա ընդամենը մի պահ է երևացել նիստերի դահլիճում ու նորից անհետացել է:Ավելի ուշ նա նույնպես «ՀԺ»-ի թղթակցի հեռախոսազանգերին չի պատասխանել: