Էրդողանի բարձրագույն կրթության դիպլոմը կեղծ է

Թուրքիայի ընդդիմադիր Ազգայնական շարժում կուսակցության (ԱՇԿ) փոխնախագահ Յուսուֆ Հալաչօղլուն հայտարարել է, որ վարչապետ Ռեջեփ Թայիբ Էրդողանի Մարմարայի համալսարանի տնտեսական եւ կառավարման ֆակուլտետի շրջանավարտի դիպլոմը կեղծ է:

Ինչպես հաղորդում է թուրքական «Հաբերլեր» լրատվական կայքը, Հալաչօղլուն հայտնել է, որ Էրդողանի բարձրագույն կրթություն ստանալու մասին դիպլոմում համալսարանն ավարտելու ժամկետը նշված է 1981 թ., այն դեպքում, երբ Մարմարայի համալսարանը հիմնադրվել է 1982 թ.:

Հալաչօղլուն Էրդողանի բարձրագույն կրթություն չունենալու մասին ավելի վաղ արած հայտարարության մեջ ասել էր, որ Թուրքիայի նախագահ դառնալ ձգտող վարչապետը եռամյա բարձրագույն կրթություն ունի, ինչը Թուրքիայում գոյություն չունի: Նրան հակադարձելու համար Մարմարայի համալսարանի ռեկտոր Զաֆեր Գյուլը ցուցադրել է Էրդողանի դիպլոմը: Ի պատասխան ռեկտորի համառությանը, Հալաչօղլուն Twitter-ի իր էջում գրառել է, որ համալսարանը, որը Էրդողանն ավարտել է 1981 թ., ստեղծվել է 1982 թ. եւ բերել իր պնդումն ապացուցող նրա դիպլոմի լուսանկարը: Նա նաեւ նշել է, որ դիպլոմում պահանջ վող ստորագրությունները թիվը պակաս է: