Արևմուտքը չպետք է աջակցի Մոսկվային՝ նախկին ԽՍՀՄ պետությունների հանդեպ հատուկ իրավունքներ վերապահելու հարցում. Chatham House

Վլադիմիր Պուտինի և նրա թիմի հիմնական խնդիրը «իրենց անձնական իշխանության պահպանումն է, որը նրանք ստեղծել են վերջին տասներկու տարիներին»։ Այս գնահատկանը նշվում է բրիտանական Chatham House միջազգային հարաբերությունների թագավորական ինստիտուտի փորձագետների և վերլուծաբանների պատրաստած՝ Ռուսաստանի ապագայի և Արևմուտքի հետ նրա հարաբերությունների թեմայով զեկույցում։

«Պուտինի վերադարձի հետևանքները Ռուսաստանի և Արևմուտքի վրա» վերլուծականում նշվում է, որ «2011–2012-ին՝ Ռուսաստանի ընտրական փուլի ավարտից հետո, այդ երկրում ավելի է աճելու անկայունության վտանգը»։

Զեկույցի հեղինակները պնդում են, որ «Պետդումայի՝ 2011–ի դեկտեմբերի 4–ին կայացած կեղծված ընտրությունները հաստատում են, որ Պուտինը և նրա թիմը իշխանությունն անորոշ ժամանակով պահելու մտադրություն ունեն, որը դժգոհության մեծ ալիք է բարձրացրել ռուսների, հատկապես՝ քաղաքակիրթ ընտրազանգվածի մոտ»։ 

Իշխող «Միասնական Ռուսաստան» կուսակցության նկատմամբ անվստահությունը հասել է 39%–ի: Հարցված քաղաքացիները նշել են, որ Ռուսաստանը «սխալ ուղղությամբ է» շարժվում և Պուտինի՝ համազգային առաջնորդի դերը ստանձնելու նախաձեռնությունները խարխլում են նրա լեգիտիմիության հիմքերը։   

«2011-2012 ընտրությունների փուլը նշանավորվեց պուտինյան ռեժիմի ավարտի սիկզբը դնելու հիմքերով։ Իսկ հետընտրական բողոքի ցույցերի ևս մեկ լուրջ պատճառներից են դեռևս մնում սոցիալ–տնտեսական բնույթի խնդիրները, որոնց բացասական հետևանքները քաղաքացիներն անխուսափելիորեն սկսում են զգալ իրենց սեփական մաշկի վրա», – նշվում է զեկույցում։ 

Այդուհանդերձ, զեկույցի հեղինակները նշում են, որ քիչ հավանական է՝ Ռուսաստանի ընդդիմությանը հաջողվի բողոքի ցույցերի ալիքը տեղափոխել արդյունավետ կազմակերպված ընդդիմադիր պայքարի դաշտ։ Մյուս կողմից, այդ երկրի ներկայիս իշխանությունն ի վիճակի չէ վերից վար համակարգային բարեփոխումներ նախաձեռնել, քանի որ դրանք լուրջ սպառնալիք կլինեն ներկայիս իշխանությունների համար։ 

Զեկույցի հեղինակները նաև նշում են, որ Ռուսաստանի տնտեսությունը պետք է համակարգային բարեփոխումների ենթարկվի, բայց ներկայիս իշխանությունները չեն կարող աննշան և կոսմետիկ փոփոխություններից ավելին անել։ 

Նրանք նաև իրենց կասկածն են հայտնում աշխարհաքաղաքական հարթությունում Ռուսաստանի դերի բարձրացման հնարավորության վերաբերյալ։ Ըստ նրանց՝ Արևմուտքը չպետք է աջակցի Ռուսաստանի միջազգային դերի բարձրացմանը, քանի որ «Ռուսաստանը մեծ ցանկություն ունի դրան հասնելու միջոցով իր եսակենտրոն և աշխարհաքաղաքական շահերը առաջ տանել»։ 

Զեկույցի հեղինակները կարծում են, որ «Արևմուտքը նաև չպետք է աջակցի պաշտոնական Մոսկվային՝ նախկին խորհրդային հանրապետությունների նկատմամբ հատուկ իրավունքներ վերապահելու հարցում, քանի որ  նման իրավիճակն այդ երկրների քաղաքացիներին ստիպում է ապրել անորոշության մեջ»։   

Ըստ Chatham House-ի փորձագետների՝ Պուտինի Կրեմլ վերադառնալուց հետո ԱՄՆ–ի համար Ռուսաստանի հետ հարաբերություններում շատ բարդ իրավիճակ կստեղծվի։ 

«Վաշինգտոնը ստիպված է լինելու աշխարհաքաղաքական հարցերի շուրջ պաշտոնական Մոսկվայի խեղաթյուրված տեսակետը լսել և տպավորություն ստեղծել, որ ԱՄՆ վարչակազմը կիսում է այդ տեսակետը», – նշվում է վերլուծական կենտրոնի զեկույցում։ 

Վլադիմիր Պուտինը բազմիցս հայատարարել է, որ Ռուսաստանում բողոքի ցույցերի ալիքը գալիս է արաբական աշխարհում տեղի ունեցող հեղափոխություններից և դրանց մեջ մեղադրում է ԱՄՆ–ին, Արևմուտքին և այլ միջազգային կազմակերպություններին։