Ֆրանսիայի նախագահն անլուրջ մարդ չէ, որ այսքան հեռուն գնար. Կիրո Մանոյան

«Ես նախկինում էլ ասել էի, որ եթե Ֆրանսիայի խորհուրդը հակասահմանադրական համարի Հայոց ցեղասպանության ժխտումը քրեականացնող օրինագիծը, աշխարհի վերջը չի լինի: Այժմ աշխարհի վերջը չէ»,- այսօր լրագրողների հետ հանդիպման ժամանակ ասաց ՀՅԴ Բյուրոյի Հայ դատի և քաղաքական հարցերի գրասենյակի տնօրեն Կիրո Մանոյանը՝ հավելելով, որ սահմանադրական խորհրդում կան մարդիկ, որոնք այսօր արդեն մաս են կազմում թրքամետ կազմակերպությունների, կամ նախկին քաղաքական գործիչներ, որոնք իրենց կյանքի ընթացքում այս գաղափարին դեմ էին արտահայտվել:

«Շատ լավ երևում է, որ թուրքական խոստումները և կաշառքներն իրենց դերն ունեցան: Իրականում սա միայն թուրքական ճնշումների արդյունք չէ: Սա Թուրքիային սիրաշահելու-չսիրաշահելու, նեղացնելու կամ չնեղացնելու հարց էր, որը պետք էր ոչ միայն Ֆրանսիային: Ասել, թե Սարկոզին խաղ արեց, կարծում եմ՝ ճիշտ չէ: Ֆրանսիայի նախագահն անլուրջ մարդ չէ, որ այսքան հեռուն գնար: Միաժամանակ, հակառակը փաստելու հիմքեր չունեմ: Սա, երևի, Սարկոզիի համար քաղաքական իր դիրքորոշումներն արտահայտելու միջոց է»,-ավելացրել է Մանոյանը:

Անդրադառնալով նոր օրինագիծ մշակելու Սարկոզիի հանձնարարությանը՝ Կիրո Մանոյանը նշեց, որ դա բարի կամքի դրսևորում է: