Ասադը կարող է ռազմական հանցագործ համարվել. Հիլարի Քլինթոն

ԱՄՆ պետքարտուղար Հիլարի Քլինթոնը հայտարարել է, որ Սիրիայի նախագահ Բաշար Ասադը կարող է դիտվել իբրև ռազմական հանցագործ։ Սենատում լսումների ժամանակ Կլինտոնն ընդգծել է, որ «ռազմական հանցագործ և մարդկության դեմ գործած հանցանքներ հասկացությունների ձևակերպումից ելնելով՝ կարելի է ապացուցել, որ Ասադը կարող է հայտնվել այս շարքում»։ 

Այնուամենայնիվ, Քլինթոնը միջազգային հանրությանն ուղղված՝ այդ ձևակերպումը Ասադի նկատմամբ տարածելու կոչով հանդես չի եկել։ 

Հիշեցնենք, որ ավելի վաղ սենատորներ Լինդսի Գրեմը, Ջոն Մակքեյնը և Ջոզեֆ Լիբերմանը հայտարարություն էին տարածել՝ կոչ անելով սիրիական ընդդիմությանը զինվելու հնարավորություն ընձեռել, ինչպես նաև ֆինանսավորել ու համակողմանիորեն օգնել ընդդիմադիրներին։