Վարչապետը պարգևատրել է ԽՍՀՄ ժողովրդական արտիստ Ռեգիմանտաս Ադոմայտիսին

Վարչապետ Տիգրան Սարգսյանն ընդունել է «Արմմոնո» միջազգային թատերական 10-րդ ամենամյա փառատոնի շրջանակում Երևան ժամանած լիտվական պատվիրակության անդամներին՝ Լիտվայի Հանրապետության մշակույթի փոխնախարար Դեվիդաս Ստանպոնկուսին, մշակույթի նախարարության աշխատակազմի ղեկավար Նոմեդա Զենկենեին, հանրահայտ դերասան, ԽՍՀՄ ժողովրդական արտիստ Ռեգիմանտաս Ադոմայտիսին: Հանդիպմանը ներկա էր նաև Հայաստանում Լիտվայի արտակարգ և լիազոր դեսպան Գեդրիուս Ապուոկասը: Այս մասին ասված է ՀՀ կառավարության պաշտոնական կայքում տեղադրված հաղորդագրության մեջ:

Ողջունելով հյուրերին՝ ՀՀ կառավարության ղեկավարը նշել է. «Ռեգիմանտաս Ադոմայտիսը լեգենդար մարդ է Հայաստանում: Նրան բոլորը շատ լավ են ճանաչում և հիշում: Առանձնահատուկ կապ կա Ձեր և Հայաստանի միջև, և առավել ևս եթե դա վերաբերում է մշակույթին, կինոարվեստին և թատրոնին, մեր ժողովրդի կողմից ենթագիտակցորեն առավել զգացմունքային է ընկալվում: Դուք գիտեք, որ շատ մշակութային նորմեր փոխանցվում են հենց կինոյի միջոցով, և այդ տեսանկյունից Դուք արվեստի այն դեմքերից եք, ում մեր ժողովուրդը իրենն է համարում: Շատ հաճելի է ընդունել Ձեզ Հայաստանում»:

Կողմերը քննարկել են Հայաստանի և Լիտվայի միջև մշակութային համագործակցությանն առնչվող հարցերի լայն շրջանակ, անդրադարձել ընթացիկ ծրագրերին: Վարչապետ Սարգսյանը կարևորել է «Հայաստանի Հանրապետության կառավարության և Լիտվայի Հանրապետության կառավարության միջև մշակույթի ոլորտում համաձայնագրի» ստորագրումը, ինչը նոր լիցք կհաղորդի հայ-լիտվական մշակութային կապերի սերտացմանը: Զրուցակիցները մտքեր են փոխանակել երկու երկրներում ժողովրդավարական արժեքների հաստատման և քաղաքացիական հասարակության ձևավորման հարցերի շուրջ:

Ծննդյան 75-ամյա հոբելյանի առթիվ և համաշխարհային ու լիտվական կինոարվեստում ունեցած պատկառելի վաստակի, ներդրած ակնառու ավանդի, անզուգական վարպետության համար Տիգրան Սարգսյանը Ռեգիմանտաս Ադոմայտիսին պարգևատրել է Հայաստանի Հանրապետության վարչապետի հուշամեդալով:

2012 թ. փետրվարի 29-ից մարտի 5-ը Երևանում անցկացվելու է մոնոներկայացումների «Արմմոնո» միջազգային թատերական 10-րդ ամենամյա հոբելյանական փառատոնը, որի կազմակերպիչներն են ՀՀ մշակույթի նախարարությունը, Հայաստանի թատերական գործիչների միությունը և «Սայաթ-Նովա» ու «Վահագն» մրցանակաբաշխությունների կենտրոն» ՀԿ-ն:

10-րդ հոբելյանական փառատոնի հիմքում «լիտվական» ծրագիրն է՝ նվիրված Հայաստանի և Լիտվայի միջև դիվանագիտական և մշակութային կապերի հաստատման 20-ամյակին: Այդ կապակցությամբ փառատոնի բացմանը ներկա կգտնվի լիտվական պատվիրակությունը: Փառատոնի շրջանակում փետրվարի 29-ին Կ. Ստանիսլավսկու անվան ռուսական պետական դրամատիկական թատրոնում տեղի կունենա հանրահայտ դերասան, ԽՍՀՄ ժողովրդական արտիստ Ռեգիմանտաս Ադոմայտիսի ստեղծագործական երեկոն (դերասանը հանդես կգա իր մոնոլոգներով, արտասանական վարպետությամբ, կներկայացնի իր ստեղծագործական ուղին): Փառատոնին հյուրընկալվելու են նաև Գերմանիայից, Սերբիայից, Լեհաստանից և Ռուսաստանի Դաշնությունից մոնոներկայացումների փառատոնների տնօրեններ և թատերական գործիչներ: