Ռուսաստանի արտգործանախարարը և «Պարսից ծոցի երկրների խորհուրդ»–ը կհանդիպեն մարտի 7–ին

Ռուսաստանի արտաքին գերատեսչության ղեկավարի և «Պարսից ծոցի երկրների համագործակցության խորհրդի» անդամ երկրների արտգործնախարարների հանդիպումը Սիրիայի հարցով տեղի կունենա մարտի 7–ին, հաղորդում է «Ռիա նովոստի»-ն։
Քուվեյթի արտաքին գործերի նախարար շեյխ Սաբահ ալ-Խալեդ ալ-Խամադ աս-Սաբահն այդ հանդիպման մասին հայտարարել է իր երկրի խորհրդարանում ելույթի ժամանակ։ Նա ավելացրել է, որ Պարսից ծոցի երկրների խորհրդի անդամ վեց երկրների արտգործանախարարները մտադիր են իրենց «խորը հիասթափությունը հայտնել Սիրիայի հարցում Ռուսաստանի դիրքորոշման վերաբերյալ»։ Նման հանդիպում անցկացնելու առաջարկն արել է Ռուսաստանի արտաքին գործերի նախարար Սերգեյ Լավրովը՝ փետրվարի կեսերին։

ՄԱԿ–ի Անվտանգության խորհրդում Սիրիայի հարցով բանաձև ընդունելու վերաբերյալ արդեն երկորդ անգամ (վերջինը փետրվարի 4–ին) ԱԽ–ի անդամներ Ռուսաստանը և Չինաստանը վետո են կիրառում՝ իրենց որոշումը հիմնավորելով փաստաթղթում ոչ պատշաճ ձևակերպումներ լինելու փաստը։

Հիշեցնենք, որ Սիրիայում արդեն մոտ մեկ տարի է՝ չեն դադարում կառավարության դեմ ուղղված բողոքի ցույցերը։ Ընդդիմությունը պահանջում է երկրի նախագահ Բաշար Ասադի հրաժարականը։ Գրեթե ամեն օր երկրի անվտանգության ուժերի և ցուցարարների միջև տեղի ունեցող բախումների պատճառով զոհերի թիվն ավելանում է։ Ըստ ՄԱԿ–ի վերջին տվյալների՝ զոհերի թիվը հասել է 7.300–ի։