Թուրքիայում ստորագրահավաք է սկսվել` հայ զինծառայողի սպանության գործով արդար դատավարության պահանջով

Երեք տարի առաջ Հայոց ցեղասպանության զոհերի հիշատակի օրը' ապրիլի 24-ին թուրքական բանակում սպանված ազգությամբ հայ զինծառայող Սևակ Շահին Բալըքչըի գործով արդար դատավարություն անցկացնելու պահանջով ստորագրահավաք է սկսվել Թուրքիայում: Այս մասին հայտնում է թուրքական Bianet անկախ լրատվական կայքը: Նշվում է, որ ստորագրահավաքն սկսվել է change.org կայքում:

Սևակն սպանվել է 2011 թ. ապրիլի 24-ին իր զորամասում, խիստ կասկածելի հանգամանքներում: Նրա ընտանիքը գտնում է, որ նա Հայոց ցեղասպանության զոհերի հիշատակի օրը սպանվել է միտումնավոր, ինչն էլ հանդիսանում է Ցեղասպանության շարունակությունը ներկայիս Թուրքիայում: Այժմ նրա սպանության գործը քննում է Թուրքիայի Գերագույն դատարանը: Դատախազը պնդում է, որ Սևակի միտումնավոր սպանության վերաբերյալ փաստերը բավարար չեն:

Ստորագրահավաքի ակցիայի մասնակիցները պահանջում են, որ պատժվեն Սևակի սպանության մեջ մեղավոր բոլոր անձինք:

Ստորագրահավաքի հետ կապված հայտարարության մեջ ասվում է. «Սևակի` Գերագույն դատարանի վճռին սպասող ընտանիքը կարծում է, որ Հայոց ցեղասպանության հիշատակի օրը' ապրիլի 24-ին նրա սպանվելը պատահականություն չէ»:

Սևակ Շահին Բալըքչըն Բաթմանի զինծառայության վայրում իր ծառայակցի կողմից սպանվել է ծառայության ավարտից 23 օր առաջ: Սպանությունից առաջ մարդասպան Քըվանչ Աղաօղլուն նրան ասել էր. «Թմբլիկ, քեզ սպանելու եմ»: Թուրքական դատարանը մարդասպան Աղաղօղլուին դատել էր «անզգուշության հետևանքով անձի մահվան պատճառ դառնալու» մեղադրանքով և 4 տարի 5 ամիս ազատազրկման պատիժ սահմանել: