Երբ ժողովուրդը ոտքի է կանգնում, իշխանությունը դառնում է անօգնական. Տիգրան Պասկևիչյան

Մարտի 1–ի դեպքերի հարցում ինչ–որ բան փոխելու համար պետք է փոխվեն իշխանությունները. քանի կան այս իշխանությունները՝ Մարտի 1–ը չի բացահայտվելու։ Իսկ եթե մարտի մեկը չի բացահայտվում, դա նշանակում է, որ մշտապես կա դրա կրկնման վտանգը։ Նման կարծիք Լուրեր.com–ի հետ զրույցում հայտնեց գրող, հրապարակախոս Տիգրան Պասկևիչյանը։

Ըստ նրա՝ եթե Հայաստանում կա շահագրգռություն, որպեսզի Մարտի 1-ը չկրկնվի, պետք է ամեն ինչ անել, որպեսզի լինեն ազատ և օրինական ընտրություններ, իսկ այդպիսի ընտրություններ անցկացնելու համար անհրաժեշտ է հասարակության ակտիվ մասնակցություն։ 

«Ընտրակաշառք վերցնողները միշտ շատ չնչին փոքրամասնություն են, բայց միշտ այդ չնչին փոքրամասնությունն է մեր փոխարեն որոշում, թե ով պետք է Հայաստանում լինի իշխանություն, որովհետև մենք նստում ենք տանը և չենք գնում ընտրության», – կարծում է հրապարակախոսը։

Պատասխանելով լրագրողի այն հարցին, թե ինչու իշխանությունները, գոնե ձևական, Մարտի 1-ի դեպքերի մեղավորների չեն ներկայացնում հանրությանը՝ իրենց «անունը մաքրելու» համար, Պասկևիչյանն ասաց. «Իրենք իրենց անունը մաքրելու խնդիր չունեն, այդ խնդիրը  իրենք լուծեցին միջազգային կառույցների հետ։ Այդ միջազգային կառույցներին, ես չգիտեմ ինչ ճանապարհներով, համոզեցին, որ իրենք մաքրվելու խնդիր չունեն։ Միջազգային կազմակերպություններն էլ, մասնավորապես՝ ԵԽԽՎ–ի համազեկուցողները, ասացին, որ Մարտի 1-ի էջը փակվել է արդեն»։

Անդրադառնալով «Արտակարգ դրության իրավական ռեժիմի» մասին օրենքին՝ Պասկևիչյանը նշեց, որ այդ օրենքի մեջ որևէ վտանգավոր բան չի տեսնում, և այն ունի հոգեբանական ճնշում բանեցնելու նպատակ։

«Մեր աչքի առաջ արաբական աշխարհում տեղի ունեցած դեպքերը ցույց տվեցին, որ նույնիսկ Կադաֆիի նման բռնապետը անզոր է, երբ ժողովուրդը ոտքի է կանգնում։ Ուզում է՝ օրենքով անեն, ուզում է՝ զորքին իրավունք տան... Երբ ժողովուրդը ոտքի է կանգնում, իշխանությունը դառնում է անօգնական», – հավատացած է նա։