ԱԺ-ում մեկնարկում են «ՀՀ 2012թ. պետական բյուջեի մասին» օրենքի նախագծի նախնական քննարկումները

Նոյեմբերի 1-ից ՀՀ Ազգային ժողովի մշտական հանձնաժողովներում կմեկնարկեն «Հայաստանի Հանրապետության 2012թ. պետական բյուջեի մասին» օրենքի նախագծի նախնական քննարկումները՝ կառավարության ներկայացուցիչների մասնակցությամբ:

Գալիք տարի եկամուտների ծավալը ծրագրավորվել է 910.02 մլրդ դրամ, ծախսերը' 1տրիլիոն 42.56 մլրդ դրամ, դեֆիցիտը (պակասուրդը)' 132.54 մլրդ դրամ: 2011թ.-ի համար հաստատված ցուցանիշների համեմատ եկամուտներն ավելի են շուրջ 57.6 մլրդ դրամով, ծախսերը' 41.5 մլրդ դրամով, իսկ դեֆիցիտը' պակաս 16.1 մլրդ դրամով:

2012 թվականի համար իրական ՀՆԱ-ի աճը կանխատեսվում է 4.2 տոկոս, գնաճը' 4.1 տոկոս, արտաքին պարտքը' շուրջ 4.1 մլրդ ԱՄՆ դոլար կամ ՀՆԱ-ի 36.1 տոկոսը:

Մինչեւ նոյեմբերի 8-ը ներառյալ գումարվելիք հանձնաժողովների համատեղ նիստերում, հաստատված ժամանակացույցի համաձայն, կքննարկվեն օրենքի նախագծի մշակման սկզբունքները եւ նախագծի հիմքում դրված հիմնական մակրոտնտեսական ցուցանիշները, եկամուտների ձեւավորման, բյուջեի ծախսերի կառուցվածքի եւ ծախսային քաղաքականության, բյուջեի կատարման համար անհրաժեշտ օրենսդրական ապահովման, ինչպես նաեւ առանձին ոլորտների ֆինանսավորման հարցերը:

Քննարկումների արդյունքում ձեւավորվելիք գրավոր առաջարկությունները ՀՀ կառավարություն կներկայացվեն նոյեմբերի 11-ին' մինչեւ ժ. 15.00-ն:

«ՀՀ 2012թ. պետական բյուջեի մասին» ՀՀ օրենքի նախագծի նախնական տարբերակը կընդգրկվի ԱԺ նոյեմբերի 14-17-ի լիագումար քառօրյա նիստերի օրակարգում: