Սիրիայի Հոմս քաղաքից զինված ընդդիմադիրների տարհանման պայմանագիրը «հաջողությամբ կատարվում է»

Սիրիայի Հոմս քաղաքից զինված ընդդիմադիրների տարհանման պայմանագիրը «հաջողությամբ կատարվում է»: Այդ մասին մայիսի 8-ին «Ալ Վաթան» լրատվական ծառայությանը հայտնել է երկրի այդ կենտրոնական նահանգի նահանգապետ Թալյալ ալ Բարազին:

«Քաղաքից հեռացել է 980 մարդ, որոնց մեծամասնությունը զինյալներ են, բայց կան նաև խաղաղ քաղաքացիներ՝ կանայք ու երեխաներ»,- նշել է նա: Նահանգապետի խոսքով՝ իշխանություններին հանձնվելու ցանկություն է հայտնել 62 խռովարար: «Նրանք եկել էին զենքով և այն հանձնեցին զինծառայողներին»,- ասել է ալ Բարազին:

«Գործողությունն սկսվել է վաղ առավոտյան և շարունակվել մինչև մայրամուտ,- ճշտել է նահանգապետը:- Մարդկանց դուրս էին բերում խմբերով: Գործարքի պայմանների համաձայն՝ մարդկանց յուրաքանչյուր նոր խումբն ուղարկվում էր այն բանից հետո, երբ տեղեկություններ էին ստացվում, որ Հալեպում և Լաթաքիայում գերությունից ազատվել են պատանդները: Ընդամենն օրվա ընթացքում զինյալներն այնտեղ ազատ են արձակել 70 մարդու, որոնց մեծամասնությունը կանայք և երեխաներ են»:

Ալ Բարազին հայտնել է, որ մայիսի 8-ին գործողությունը կշարունակվի: Նախատեսվում է պլանավորված երթուղով Դեր էլ Կաբիրա (գտնվում է Հոմսից 20 կիլոմետր հեռավորության վրա) տարհանել ևս 300 մարդու: Նահանգապետը նշել է Հոմսի ինչպես մուսուլմանական, այնպես էլ քրիստոնեական համայնքների հոգևոր առաջնորդների արիությունը, որոնք անմիջական մասնակցություն են ունեցել համաձայնագիր կատարմանը: Նրա խոսքով՝ յուրաքանչյուր ավտոբուս (ընդամենն օգտագործվել է 24 փոխադրամիջոց) ուղեկցում էին կրոնական գործիչները, որոնք հանդես եկել որպես գործարքի երաշխավորներ, հաղորդել է ԻՏԱՌ-ՏԱՍՍ-ը: