«Դավաճանը ֆաշիստ է, կնատյաց ու ռուսամետ»

Նախախորհրդարանի անդամ Տիգրան Խզմալյանը ֆեյսբուքյան իր էջում գրել է.

«Մեզ սպասում են ծանր փորձություններ և խորը քաղաքացիական խզում, որն անցնելու է արժեհամակարգային ու քաղաքակրթական սահմաններով: Սին պատրանք է, թե իբր մենք մեր «հայկազյան գենոմով» կարող ենք մեկուսանալ ու սպասել տապանի ներսում, թե երբ է անցնելու ջրհեհեղը: Նախ, մենք տապան դեռ չենք էլ կառուցել, իսկ այս փոքրիկ ու ծակ նավակը այժմ շղթայված է խորտակվող ռուսական «Տիտանիկին»: Վերջին զարգացումները խիստ բաժանարար գծեր քաշեցին աշխարհում և Հայաստանը, շնորհիվ իշխող ստրուկների, հայտնվեց Հյուսիսային Կորեայի, Սուդանի ու Զիմբաբվեի հետ նույն ճամբարում: Հայակենտրոն ու հայանպաստ քաղաքականությունը երբեք չի հաջողվի, եթե մենք ընթանանք ընդդեմ ողջ աշխարհի, հաճոյանալով գավառական հետամնացությանը, ի հեճուկս արդիականացմանը: Մեր բոլոր պատմական հաղթանակները կապված էին ազգային նորարարության հետ, սակայն միշտ տոգորված էին ազգի և անձի ազատության ու անկախության գաղափարներով: Ճակատագիրն ուղարկում է մեզ այս օրերին վառ օրինակներ, թե որտեղ ենք մենք հայտնվել սեփական անորոշության ու անսկզբունքայնության պատճառով: Ես ճակատագրական նշան և ուղերձ եմ համարում երեկվա խայտառակությունը Գավառում: Ուշադիր նայեցեք այդ լպիրշ կերպարին' լֆիկի վարձկանը, որը խաժամուժ էր առաջնորդում Երևանի Շուկան ոչնչացնելու ժամանակ, այսօր հայհոյում է Սփյուռքը, պաշտպանում է հայ կնոջը ծեծելու ու սպանելու «հայավարի տղու իրավունքը» և միաժամանակ գովաբանում է ռուսասիական բռնամիությանը հանձնվելու դավադրությունը: Ինչպիսի կատարյալ զուգադիպություն...Այլ կերպ, այլ բաղադրիչներով էլ ինչպե՞ս կարող էր լիներ: Ֆաշիստ, կնատյաց, ռուսամետ: Սա է պատկերը մեր ազգային դավաճանի ու թշնամու: Եվ այս բաղադրիչներից որևե մեկն անգամ պատահական չէ' դրանք մեր ազգային աղետի կատարյալ «ներդաշնակությունն» են կազմում: Մերժելով կանանց հավասարությունը' պառակտում ու քանդում եք Հայաստանը: Փնովելով Սփյուռքը' պառակտում ու քանդում եք ողջ հայությունը: Մտնելով ռուսասիական բռնամիություն' մերժում ու քանդում եք հայոց պետությունը: Այսպիսի եռամիություն, տիկնայք ու պարոնայք»: