Սիրիայի բանակը վերահսկողության տակ է վերցրել ընդդիմության հենակետերից մեկը

«Սիրիայի անկախ բանակ»–ի ներկայացուցիչները հայտարարել են, որ տակտիկական նկատառումներով կառավարական ուժերին են զիջել Հոմսի Բաբ Ամր թաղամասը, հաղորդում է BBC Russian–ը։

Հաղորդվում է, որ այս պահին այդ թաղամասում մի քանի զինյալ ապստամբներ են գտնվում, որոնք փորձում են տարածքից դուրս բերել մյուս խմբերին։ Իր հերթին, սիրիական բանակը տեղեկացնում է, որ արդեն լիարժեք իր վերահսկողության տակ է վերցրել մեկ ամիս շարունակ ընդդիմության հենակետ համարվող թաղամասը։

Հիշեցնենք, որ նախօրեին Սիրիայի զորքերը հատուկ ռազմական գործողություններ էին սկսել Հոմսի Բաբ Ամր թաղամասի վերահսկողությունն իր ձեռքը վերցնելու նպատակով։ 

Արդեն մեկ տարի է Սիրիայում շարունակվում են հակակառավարական բողոքի ցույցերը, որի պատճառով ըստ ՄԱԿ–ի տվյալների զոհվել է մոտ 7.300 մարդ։ Ընդդիմությունը պահանջում է նախագահ Բաշար Ասադի հրաժարականը։