«Հայկական Ժամանակ». Տպավորություններ երեկվա հանրահավաքից

Հայ ազգային կոնգրեսի երեկվա հանրահավաքի մասնակիցները անասելի սուլոցներով արձագանքեցին «Երկրապահ կամավորականների միության վերջին համագումար» արտահայտությանը, որ հնչեց Կոնգրեսի առաջնորդ, Հայաստանի առաջին նախագահ Լևոն Տեր-Պետրոսյանի ելույթում: Տեր-Պետրոսյանը նկատեց, թե ինքը շատ կուզենար, որ այդ արձագանքը հասներ նշված համագումարի մասնակիցներին: Հանրահավաքի մասնակիցների շրջանում բուռն արձագանքի արժանացավ նաև առաջին նախագահի ելույթի այն հատվածը, որտեղ նա հայտարարեց. «Սեփական ժողովրդի արյունը թափած ոճրագործները երբ էլ լինի, կանգնելու են արդար դատարանի առջև: Նիկոլաե Չաուշեսկուի, Էրիխ Հոնեկերի, Սադամ Հուսեյնի, Մուամար Կադաֆիի  և Հոսնի Մուբարաքի թշվառ վախճանը ձեզ օրինակ»: Երեկվա հանրահավաքը քաղաքական սեզոնի տպավորիչ մեկնարկ էր, նաև սիմվոլիկ էր: Հանրահավաքների մշտական մասնակից Փառանձեմ մայրիկը հրապարակավ այրեց Ռոբերտ Քոչարյանի և Սերժ Սարգսյանի լուսանկարները: Հանրահավաքն ավարտվեց երթով դեպի Մյասնիկյանի արձան, որտեղ Կոնգրեսի ներկայացուցիչները, երթի մասնակիցները՝ Լևոն Տեր-Պետրոսյանի գլխավորությամբ, ծաղիկներ դրեցին Մարտի 1-ի զոհերի հիշատակին: 

Լուսանկարը՝ Արման Վեզիրյանի