Թուրքական մամուլի անդրադարձը Ֆրանսիայի նախագահի` Հայաստան այցին

Թուրքական մամուլը լայնորեն անդրադարձել է Ֆրանսիայի նախագահ Ֆրանսուա Օլանդի' Հայաստան կատարած այցին' սևեռվելով հիմնականում Հայոց ցեղասպանությունը ճանաչելու մասին Անկարային արած նրա կոչի վրա:

Թուրքական մամուլը քիչ ուշադրություն է հատկացրել Երևանում Ֆրանսիայի և Հայաստանի նախագահների մասնակցությամբ անցկացված հայ-ֆրանսիական տնտեսական ֆորումի և Հայաստան-Ֆրանսիա տնտեսական համագործակցության զարգացման հեռանկարների վրա: Թուրքական մամուլն ավելի շատ լուսաբանել է Ցեղասպանության զոհերի հուշահամալիր Օլանդի կատարած այցը և Հայոց ցեղասպանությունը ճանաչելու մասին Թուրքիային նրա արած կոչը:

Թուրքական մամուլն Օլանդի Հայաստան այցի հետ կապված հաղորդագրությունները հիմնականում վերնագրել է «Օլանդի կոչը Թուրքիային. Հայոց ցեղասպանության ճանաչումը չի բաժանի, կմիավորի», «Օլանդից կոչ Թուրքիային' ճանաչել ցեղասպանությունը», «Երևանից ուղերձ է հղել Թուրքիային», «Ֆրանսիայի նախագահից Թուրքիային ուղղված ցնցող կոչ», «Երևանից դիմել է Թուրքիային» ձևակերպումներով և բերել հուշահամալիրում արված լուսանկարներ:

Ֆրանսիայի նախագահ Ֆրանսուա Օլանդը Հայոց ցեղասպանության թանգարան այցից հետո Թուրքիային կոչ է արել ճանաչել Հայոց ցեղասպանությունը:

Թուրքական մամուլը մեջբերել է Հայոց ցեղասպանության ժխտումը դատապարտող օրենքի հետ կապված Ֆրանսիայի նախագահի հետևյալ խոսքը. «Ժխտողականության դեմ ոչ մի դուռ բաց չի կարող լինել: Աշխարհի ամեն կողմում ցեղասպանության ճանաչման գործընթացներ են տեղի ունենում: Ճանաչումը ոչ թե կբաժանի, այլ կմիավորի»: