«Հայկական Ժամանակ». Ազգային վիճակագրական ծառայությունը նոր գլուխգործոց է հորինել

ՀՀ ազգային վիճակագրական ծառայությունը մի նոր գլուխգործոց է ծնել: Այս տարվա փետրվարի գնաճի մասին երեկ հրապարակած զեկույցից տեղեկանում ենք, որ այս տարվա փետրվարին հունվարի համեմատ գները ոչ միայն չեն աճել, այլ նաև նվազել են: Թերթը նշում է, որ չի չափազանցում: ԱՎԾ-ի պաշտոնական ցուցանիշներով՝ փետրվարին Հայաստանում արձանագրվել է գների 0.9 տոկոս անկում: Ընդ որում, պարենային ապրանքները էժանացել են 1.9 տոկոսով:  Թերթը հիշեցնում է, որ ընդամենը մի քանի օր առաջ կանխատեսել էր, որ նախընտրական այս շրջանում Ազգային վիճակագրական ծառայությունը  լիքը հաճելի անակնկալներ է մատուցելու: Սա դրանցից միայն մեկն է: Թե որքանով է կյանքը փետրվարին՝ հունվարի համեմատ էժանացել, թող դատեն տնային տնտեսուհիները, որոնք պարբերաբար գնում են խանութներ, շուկաներ ու առևտուր են անում: Թերթը նշում է նաև, որ նույնիսկ ՀՀ տնտեսական մրցակցության պետական հանձնաժողովի տվյալներով՝ փետրվարին հունվարի համեմատ ալյուրը Հայաստանում թանկացել է 8 տոկոսով: Իսկ ցանկացած վարորդ կփաստի, որ միայն փետրվարի ընթացքում բենզինի մեկ լիտրը Հայաստանում թանկացել է 20 դրամով կամ 5 տոկոսով: Ու եթե այս իրավիճակում ԱՎԾ-ն «արձանագրում է» էժանացում, նշանակում է՝ փետրվարին, ըստ ԱՎԾ-ի, ՀՀ տնտեսական աճը երկնիշ պետք է լինի: Սպասենք՝ կհամոզվենք: