Արվեստների ավանդական «ART EXPO» ցուցահանդես

ՀՀ մշակույթի նախարարությունը 2012 թ. մարտի 3-5-ը Հայաստանի նկարիչների միությունում անցկացնում է արվեստների ավանդական «ART EXPO» ցուցահանդեսը: Մշակութային արտադրանք, ձեռքբերումներ, նախագծեր, նախաձեռնություններ...և, իհարկե, անակնկալներ: «ART EXPO– 2012»-ը սպասում է իր մասնակցին ու հանդիսատեսին: Այս մասին ասված է ՀՀ մշակույթի նախարարության պաշտոնական կայքում զետեղված հաղորդագրության մեջ։

ՀՀ մշակույթի նախարարության նախաձեռնությամբ 4 տարի առաջ՝ 2009 թ. մեկնարկած այս ցուցահանդեսը ոչ միայն իր ուրույն և հաստատուն տեղն է գտել հանրապետության մշակութային կյանքում, այլև կենսունակության շնորհիվ հետագա տարիների ընթացքում շարունակաբար ընդլայնվելով՝ արվեստների ցուցահանդեսից վերածվել է նոր ծրագրերի, գաղափարների, նախաձեռնությունների ներկայացման մշակութային հարթակի: Այսպիսին է «ART EXPO»-ի 4 տարիների կենսագրականը. 2009 թ. նախաձեռնությանը մասնակցել է 20 մշակութային կազմակերպություն և ներկայացվել է 10 ծրագրի շնորհանդես, 2010 և 2011 թթ.՝ յուրաքանչյուր տարի մասնակցել են ավելի քան 50 պետական և հասարակական կազմակերպություններ ու կառույցներ՝ ներկայացնելով համապատասխանաբար 16-17 շնորհանդեսներ: 2012 թ. արվեստների ցուցահանդեսը էապես տարբերվում է նախորդներից թե’ կառուցվածքով և թե’ ծրագրային ու շնորհանդեսային պատկերով: Այս տարի «ART EXPO»-ի հիմնական ցուցադրական մասը բաղկացած է 44 հատվածներից, որոնցում ներկայացվող ավելի քան 200 ծրագրերն ու նախագծերը, շուրջ 35 շնորհանդեսները հնարավորություն կտան մեկ ընդգրկումով ծանոթանալու նախորդ տարվա հայրենական մշակութային արտադրանքին, մշակութային կյանքի հիշարժան դրվագներին՝ կատարվածին ու դեռևս սպասվելիքին: Մեկ կարևոր առանձնահատկություն ևս՝ Երևանը՝ որպես գրքի 2012 թ. համաշխարհային մայրաքաղաքի տիտղոսակրի և հայ տպագիր գրի 500-ամյա հոբելյանին նվիրված՝ 2012 թ. «ART EXPO»-ն կանցնի գրի, գրականության ու գրավոր ժառանգության խորհրդի ներքո:

Այս տարի ևս «ART EXPO»-ն կանցկացվի Հայաստանի նկարիչների միությունում, որի.

- 1-ին և 2-րդ հարկերի 44 պայմանական գոտիներում թեմատիկ խորագրերի ներքո /«Գրական Հայաստան», «Մեր անկախությունը 20 տարեկան է», «Համայնքային էքսպո», «Գրավոր ժառանգության ակունքներում», «Ավանդական արվեստ, արհեստ, կենցաղ», «Հայ կամերային երաժշտության անթոլոգիա», «Հայկական ներկապնակ. միջազգային հասցեներ» և այլն/ և 3-րդ հարկի սրահում այցելուն հնարավորություն կունենա ծանոթանալու հայկական մշակութային համայնապատկերին:

- 1-ին հարկի սրահում ժամը 18:00-ից կհնչի ջազ, նախասրահում կգործի գրական սրճարանը:

- Այցելուները հնարավորություն կունենան նաև ծանոթանալու «Մուտքը՝ գրքով» ակցիայի արդյունքում հավաքված գրականությանը. 13552 անուն գրքերն ու ՀՀ մշակույթի նախարարության կողմից պետական պատվերով հրատարակված 10.000 միավոր գրականությունը մարտի 5-ին կբաշխվի ու կուղևորվի 9 մարզերի սահմանամերձ 28 գրադարաններ: Ի դեպ, «ART EXPO»-ի օրերին այդ գրականությունը կարող է համալրվել նաև շնորհիվ ցուցահանդեսի այցելուների նվիրատվությունների:

- Ցուցահանդեսի շրջանակներում կպարգևատրվեն Հայկական գրատպության 500-ամյակի հոբելյանական ծրագրերի միջոցառումները համակարգող պետական հանձնաժողովի կողմից հայտարարված «Գիրքը, որը փոխեց իմ կյանքը» թեմայով շարադրությունների և «Լեզուն հայրենիք է» թեմայով էսսեների մրցույթների հաղթողները: