Սիրիական բանակը մտել է Հալեպի կենտրոնական բանտ
Մերձավոր Արևելք
Սիրիական բանակը մտել է Հալեպի կենտրոնական բանտ: Ինչպես հաղորդում է լիբանանյան «Ալ Մայադին» կայքը, բանակին հաջողվել է ճեղքել զինյալների շրջափակումը և մտնել բանտ: Բանտում գտնվում են 2,5 հազար բանտարկյալներ, որոնց թվում կան ընդդիմության կողմնակիցներ: Երկար ժամանակ զինյալները փորձել են գրավել բանտը, սակայն ապարդյուն:
Տեղեկություններ կան այն մասին, որ նախօրեին Հակոբի բերդի և Հիլան գյուղի վրա վերահսկողություն հաստատելուց հետո բանակն իր ձեռքն է վերցրել նաև Շեյխ Նաջար շրջանում գտնվող ջերմաէլեկտրակայանը:
Ընթացող ռազմական գործողությունները հաջողությամբ ավարտվելուց հետո Սիրիայի հյուսիսում իրավիճակը կփոխվի կառավարական ուժերի օգտին, իսկ Հալեպում գտնվող զինյալների հենակետերը վերացնելը միայն ժամանակի հարց կլինի:
Սիրիական ՍԱՆԱ գործակալությունը տեղեկացնում է, որ Հալեպում և մերձակա գյուղերում բանակը տասնյակ զինյալներ է ոչնչացրել: Բանակը ալ Լիրմուն թաղամասում զինյալներին պատկանող տանկ է ոչնչացրել: Տասնյակ զինյալներ սպանվել են Քաֆր Համրա, Քաֆր Դաիլ, Սուքքարի, Ջանդուլ, Ադնան, Հանդարաթ, Մարաա, Հարյաթան, Հայան, Մարաա ալ Արթիկ շրջաններում:
ՄԱԿ-ի տվյալներով` Սիրիայում եռամյա հակամարտության ընթացքում զոհերի թիվը գերազանցել է 150 հազարը: Զոհված հայերի թիվը մոտենում է 100-ին:
ՈՒՂԻՂ ԵԹԵՐ
Ամենադիտված 
«Անցած գիշեր Գյումրիի երկնքում բնակիչները ֆիքսել են այսպիսի լուսին». Գագիկ Սուրենյան (տեսանյութ)
