Ստամբուլում բախումների ժամանակ ռումբի պայթյունից տուժել է 9 մարդ

Թուրքիայի Մանիսայի նահանգի Սոմա քաղաքի ածխահանքում աղետի հետևանքով 301 հանքափորների զոհվելու կապակցությամբ բողոքի ակցիայի ժամանակ մայիսի 22-ին երիտասարդ ստամբուլցի Ուղուր Քուրթի գլխից ծանր վիրավորվելու և հիվանդանոցում մահանալու հետ կապված` երեկ գիշեր Ստամբուլի Օքմեյդան, Սուլթանգազի և Սանջաքթեփե շրջաններում բողոքի դուրս եկած ցուցարարների և ոստիկանության միջև բախումներ են տեղի ունեցել:

Ինչպես հաղորդում է CNNTurk հեռուստաալիքը, Օքմեյդանում մի ցուցարարի կողմից պատրաստված ինքնաշեն ռումբի պայթյունից տուժել է 7 ոստիկան և 2 քաղաքացիական անձ, որոնցից մեկը ծանր բեկորային վիրավորում է ստացել գլխից:

Ցուցարարները փողոցները փակել են աղբամաններով և իրավապահների վրա քարեր ու դյուրավառ հեղուկով լի շշեր նետել: Ոստիկանությունը ցուցարարներին ցրելու համար արցունքաբեր գազ և ջրաշիթեր է կիրառել:

Ստամբուլում և Թուրքիայի բազմաթիվ քաղաքներում բողոքի ակցիաները սկսվել են Սոմայի ածխահանքում մայիսի 13-ի գիշերը տեղի ունեցած վթարից հետո, որի արդյունքում 301 մարդ զոհվել, 487 մարդ վնասվածքներ են ստացել: Ցուցարարները աղետի համար պատասխանատու են համարել թուրքական կառավարությանը' նրան մեղադրելով հանքում անվտանգության կանոնները պատշաճ մակարդակի վրա չպահելու և անտարբերություն ցուցաբերելու մեջ: