Ստամբուլում գործողություններ են սկսվել զանգվածային բողոքի ակցիայի մասնակիցների դեմ. DHA

Այսօր վաղ առավոտյան թուրքական անվտանգության մարմինները հատուկ գործողություններ են սկսել նախօրեին տեղի ունեցած զանգվածային բողոքի ակցիայի մասնակիցներին հայտնաբերելու և պատժելու համար, որի ժամանակ ոստիկանության և ցուցարարների միջև տեղի ունեցած բախումների ժամանակ զոհվել էին երկու քաղաքացի և վիրավորվել բազմաթիվ քաղաքացիներ և ոստիկանության աշխատակիցներ: Նշվում է, որ Ստամբուլի ոստիկանությունն արդեն 15 կասկածյալ է ձերբակալել, որոնք մեղադրվում են կառավարության դեմ ցույցեր և ահաբեկչական գործողություններ կազմակերպելու մեջ:

Ինչպես հաղորդում է թուրքական DHA լրատվական գործակալությունը, գործողությունները միաժամանակ անցկացվում են Ստամբուլի Օքմեյդանը թաղամասի Սանջաքթեփե և Գազի հատվածներում: Գործողություններին, որոնք անցկացնում են Ստամբուլի ոստիկանության ահաբեկչության դեմ պայքարի բաժնի աշխատակիցները, օդից ոստիկանական ուղղաթիռներ են հետևում:

Մայիսի 24-ին Ստամբուլի Օքմեյդանի հրապարակում ոստիկանների և ցուցարարների միջև բախումները սկսվել էին մայիսի 22-ին ոստիկանի կողմից գլխի շրջանում ծանր վնասվածք ստացած ցուցարար Ուղուր Քուրթի մահվան կապակցությամբ: Նշվել էր, որ ամենայն հավանականությամբ, քաղաքացին զոհվել էր ոստիկանի գործադրած հրազենից: Իրավապահները փորձել են բիրտ ուժի գործադրմամբ ցրել ցույցը: Բախումները շարունակվել են ամբողջ գիշերվա ընթացքում:

Ստամբուլում և Թուրքիայի բազմաթիվ քաղաքներում բողոքի ակցիաները սկսվել են Մանիսայի նահանգի Սոմա քաղաքի ածխահանքում մայիսի 13-ի գիշերը տեղի ունեցած վթարից հետո, որի արդյունքում 301 մարդ զոհվել, 487 մարդ վնասվածքներ են ստացել: Ցուցարարներն աղետի համար պատասխանատու են համարել թուրքական կառավարությանը' մեղադրելով նրան հանքում անվտանգության կանոնները պատշաճ մակարդակի վրա չպահելու և անտարբերություն ցուցաբերելու մեջ: