Հաքերների ձեռքերը հասել են NASA–ի համակարգիչներին

NASA-ի ստուգումները ցույց են տվել, որ անցյալ տարվա ընթացքում որոշ ժամանակ հաքերներն Ամերիկյան տիեզերական գործակալության ( NASA) համակարգչային բազա մուտք գործելու հնարավորություն են ունեցել, հաղորդում է BBC–ն։

Այս մասին ԱՄՆ–ի Կոնգրեսի լսումների ժամանակ զեկուցել է NASA–ի գլխավոր տնօրեն Փոլ Մարտինը։ Այժմ դեպքի առնչությամբ հետաքննություն է գնում։ Ըստ Փոլ Մարտինի՝ այդ հարձակումները կատարվել են չինական ինտերնետային հասցեներից։ Վերջինս այդ մասին զեկուցել է ԱՄՆ Սենատի տիեզերական գիտության և տեխնոլոգիաների հանձնաժողովի քննարկման ժամանակ։ 

Ըստ նրա՝ որոշ ժամանակ հաքերները տիեզերական գործակալության համակարգչային բազայի գաղտնի տվյալներից են օգտվել, նույնիկս ներբեռնել են ծանր ծրագրեր, որոնց մեջ գաղտնի տվյալներ են պարունակվել։ Զեկույցում նշվում է, որ 2010-2011-ին NASA–ի համակարգչային բազան ավելի քան 5 հազար անգամ հարձակման է ենթարկվել։

Ըստ Փոլ Մարտինի՝ հաքերները NASA-ի համակարգչային բազայի վրա հարձակումներ գործելու մի քանի պատճառներ ունեն, որոնցից է նաև օտարերկրյա հետախուզական ծառայությունների համար գործող գաղտնի ծառայությունների հետ կապեր ունենալը։

Ելույթ ունենալով Սենատում՝ NASA–ի ղեկավարը քննադատության է ենթարկել գործակալության կիբեռանվտանգության բազմաթիվ ասպեկտները։ Սակայն նա նշել է, որ իրականացված տարբեր հետաքննությունների արդյունքում ձերբակալվել են տարբեր երկրների հատուկ ծառայությունների համար աշխատող հաքերներ, մասնավորապես՝ Չինաստանի, Մեծ Բրիտանիայի, Իտալիայի, Նիգերիայի, Պորտուգալիայի, Ռումինիայի, Թուրքիայի և Էստոնիայի։