Վատիկանի արխիվի հրապարակված նյութերի ցուցահանդեսում Հայոց ցեղասպանության մասին վկայող փաստաթղթեր չե՞ն ցուցադրվել

Հռոմում բացված Վատիկանի արխիվի բացառիկ փաստաթղթերի Lux in Arcana ցուցահանդեսում Հայոց ցեղասպանության մասին վկայող փաստաթղթեր չեն հրապարակայնացվել:

Դեռևս 2011-ի ամռանը Վատիկանի գաղտնի արխիվի ներկայացուցիչ, եպիսկոպոս Սերջիո Պագանոն հայտնել էր, որ ներկայացվող փաստաթղթերի թվում կլինեն Հայոց ցեղասպանության մասին վկայող փաստաթղթեր, որոնցում պատմվում է թուրքական զորքերի կողմից հայերի խոշտանգումների մասին:

Չնայած մի շարք լրատվամիջոցներ տարածել են հաղորդագրություն, թե մինչև այս տարվա սեպտեմբեր շարունակվող ցուցահանդեսում արդեն ցուցադրվել են նաև Հայոց ցեղասպանության մասին վկայող փաստաթղթեր, այնուամենայնիվ, Լուրեր.com-ին հասած տեղեկություններով, այդ փաստաթղթերը չեն հրապարակայնացվել:

Տեեկությունը փորձեցինք ճշտել ՀՀ Սփյուռքի նախարարությունից: Մեզ հետ զրույցում նախարարության մամուլի և հասարակայնության հետ կապերի վարչությունից ասացին. «Դեռ ոչինչ պարզ չէ: Պարզ չէ, թե ինչ փաստաթղթեր են: Դրանք իրենց պատասխանատվության տակ են, այսինքն՝ իրենք մեզ հետ չեն կիսվում, երբ կհրապարակեն՝ կհրապարակեն, խոստացել են հրապարակել մասնավորապես ցեղասպանությանը վերաբերող փաստաթղթեր: Բայց դա իրենց գործառույթն է, մենք դրա հետ կապ չունենք: Ամենակարևորն այն է, որ հրապարակման որոշումն ընդունված է, երևի մաս-մաս կհրապարակեն: Ի միջի այլոց, այնտեղ բացել են թանգարան, որտեղ էլ այդ փաստաթղթերը ներկայացվելու են»:

Տեղեկությունները փորձեցինք ճշտել նաև Վատիկանի Lux in Arcana ցուցահանդեսի մամուլի բաժնի պատասխանատու Պատրիցիա Բրաչիից, սակայն մեր հարցմանը նա չարձագանքեց: 

Հատկանշական է, որ ցուցահանդեսի պաշտոնական կայքում ևս Հայոց ցեղասպանությանը վերաբերող փաստաթղթեր զետեղված չեն։

Մեզ հասած տեղեկությունների համաձայն՝ ցուցահանդեսում Հայոց ցեղասպանությունը վկայող փաստաթղթերը չեն հրապարակվել քաղաքական դրդապատճառներով: Չի բացառվում, որ ցեղասպանությանը վերաբերող փաստաթղթերը չեն հրապարակվել հայկական կողմի մասնավոր խնդրանքով։ Չի բացառվում նաև, որ ցուցահանդեսում այդ փաստաթղթերը չեն ցուցադրվել թուրքական դիվանագիտական ջանքերի շնորհիվ։

Հիշեցնենք, որ Սերժ Սարգսյանը նախորդ տարվա դեկտեմբերի 12-ին աշխատանքային այցով ժամանել էր Իտալիա: Այցի առաջին օրը Սարգսյանը Վատիկանում հանդիպում է ունեցել Նորին Սրբություն Հռոմի պապ Բենեդիկտոս XVI-ի հետ: Նույն օրը Սերժ Սարգսյանը հանդիպել էր նաև Վատիկանի պետքարտուղար Կարդինալ Տարչիցիո Բերտոնեի հետ: 

Իսկ ընթացիկ տարվա  փետրվարի 7-ից 12-ը Իտալիա կատարած աշխատանքային այցի շրջանակներում Հռոմի Պապի հետ էր հանդիպել ՀՀ սփյուռքի նախարար Հրանուշ Հակոբյանը։ 

Հիշեցնենք նաև, որ ձեռագրերի ցուցադրությունը նվիրված է գաղտնի արխիվի 400 ամյակին: Թղթերի մեծամասնությունը մինչ այդ տեսել են միայն գիտնականները: