«Աղանդավորականի» պիտակներով աստղերն ու նրանց սեփական մեկնաբանությունները

ATV հեռուստաընկերության «Փոփ հանրագիտարան» հեռուստանախագիծն երեկվա իր թողարկմանն անդրադարձել է հայկական շոուբիզնեսի այն աստղերին, ովքեր հանրության կողմից համարվում են աղանդավորական կազմակերպությունների համակիրներ։ Ստորև ներկայացնում ենք «մեղադրյալների» մեկնաբանությունները։

Գոռ Սուջյան, «Dorians» խմբի մեներգիչ. «Իմ բեմն իմ եկեղեցին է»

«Կնքվել եմ Հայ Առաքելական եկեղեցով։ Մինչև 14 տարեկանը հաճախել եմ «Կյանքի խոսք» եկեղեցի, դրանից հետո՝ մինչ օրս, կրոնական որևէ կազմակերպության չեմ պատկանում։ Իմ բեմն իմ եկեղեցին է, ուրիշ եկեղեցի ես չունեմ»,– նշել է խմբի մեներգիչը։

Արմինկա, երգչուհի. «Պատրաստ եմ նույնիսկ բղավել, որ աղանդավոր չեմ»

«Ես աղանդավոր չեմ։ Եթե ինչ-որ մեկն ինձ փաստարկներ ներկայացնի, որ ես աղանդավոր եմ, մի քանի անգամ ավել փաստարկներով կապացուցեմ, որ աղանդավոր չեմ, պատրաստ եմ նույնիսկ բղավել այդ մասին։ Եթե մարդիկ հավատացյալին աղանդավորից չեն տարբերում՝ իրենց խնդիրն է»,– ասել է երգչուհին։

Արսեն Գրիգորյան (Խուճուճ Արսեն), երգիչ. «Բողոքականն աղանդ չէ»

«Ես հարում եմ բողոքական եկեղեցու, և եթե ինչ–որ մեկը Հայ Ավետարանական եկեղեցին աղանդ է համարում, ուրեմն ծանոթ չէ կրոնի պատմությանը։ Բողոքականն աղանդ չէ»։

Ջուլիետա Ստեփանյան, դերասանուհի. «Տերտերը ճլտացրեց գլխիս, իսկ «Կյանքի խոսքի» հովիվը շատ բան սովորեցրեց»

«Մի անգամ Հայ Առաքելական եկեղեցում ոգևորված երգում էի աստծուն փառաբանող երգերից, տերտերը ճլտացրեց գլխիս։ Շատ վրդովվեցի։ Կցանկանայի, որ նա պատարագից հետո կանչեր ինձ իր մոտ, պարզաբաներ՝ ինչու խփեց։ Տարիներ հետո ինձ մի անգամ սկավառակ տվեցին, որտեղ «Կյանքի խոսքի» հովիվը հիանալի բացատրում էր «Տերունական աղոթքի իմաստը, նա ինձ շատ բան սովորեցրեց, այստեղ ես շատ հարցերի պատասխաններ ստացա»։

Գարիկ Պապոյան, «Vitamin» ակումբ. «Աղանդավոր նշանակում է զոմբի»

«Ոչ մի կրոնական կազմակերպության չեմ պատկանում։ «Կյանքի Խոսքից» ունեմ շատ լավ ընկերներ, որոնք հաստատ գիտեմ՝ զոմբիացված չեն։ Աղանդավոր նշանակում է զոմբի»։

Մհեր, երգիչ. «Որտեղից օգնություն է գալիս, էն եկեղեցին էլ ընդունում եմ, Հայ Առաքելական եկեղեցին մեզ չի օգնում»

«Մեր ժողովուրդը չգիտի՝ աղանդն ինչ է։ «Կյանքի խոսքը» աղանդ չէ։ Անխելք մարդ պիտի լինես, որ օգնությունից հրաժարվես, «Կյանքի խոսքն» էլ օգնում է ինձ, ինչո՞ւ հրաժարվեմ։ Իսկ Հայ Առաքելական եկեղեցին չի օգնում մեզ, օգնությունը որտեղից գալիսա, էն էլ ընդունում եմ»։

Շպռոտ, երգչուհի. «Դուք իմ հագուկապը տեսե՞լ եք, ինձնից ի՞նչ աղանդավոր»

«Եթե ինչ-որ մեկն, օրինակ, լուսանկարներ կգտնի, կամ այլ փաստեր, որոնք կապացուցեն իմ աղանդավոր լինելը, թող մտցնի աչքս։ Ես աղանդավորի նմա՞ն եմ, դուք իմ հագուկապը տեսե՞լ եք, ինձնից ի՞նչ աղանդավոր»։

Հռիփսիմե Հովհաննիսյան, երգչուհի. «Ես հպարտ եմ, որ հայ առաքելական եմ»

«Հաճախ եմ լսում անվանս շուրջ պտտվող լուրեր՝ իբր աղանդավոր եմ։ Պաշտոնապես հայտնում եմ՝ ես հայ առաքելական եմ և հպարտ եմ դրանով»։

Սոնա Շահգելդյան, երգչուհի. «Իմ հավատքն է ինձ ուժ տալիս»

«Ես Հայ Առաքելական եկեղեցու հետևորդ եմ, ու երբեք այլ եկեղեցի չեմ գնա։ Իմ հավատքն ինձ ուժ է տալիս, այլ բան ինձ հարկավոր չէ»։

Համո՝ «Հայ Թիմի» նախկին անդամ. «Երբեմն հավաքվում ենք Աստվածաշնչից տեղյակ մարդկանցով»

«Ես և կինս՝ Լիլի Էլբակյանը, ամուսնացել ենք Հայ Առաքելական եկեղեցով, որևէ աղանդավորական կազմակերպության երբևէ չենք պատկանել։ Միայն երբեմն հարազատ մարդկանցով հավաքվում ենք, Աստվածաշունչ կարդում, քննարկումներ անում։

«Փոփ հանրագիտարան» հեռուստանախագծի շրջանակներում աստղերի խոսքը մեկնաբանել է Հայ Առաքելական եկեղեցու սպասավոր՝ Տեր Եսայի քահանա Արթենյանը։

«Աղանդների արաքներն ամբողջը շոու են։ «Կյանքի խոսքն» օրինակ, ապահովում է աստղերի շոուները, ինչը ցավալի է։ Յուրաքանչյուր մարդ կոնկրետ պատվեր ընդունելուց առաջ պետք է հասկանա՝ ինչ է անում։ Եկեղեցի ֆինանսական աջակցություն ստանալու նպատակով չեն գնում։ Դրա համար կան հատուկ հիմնադրամներ, այլապես կրոնական կազմակերպությունը բիզնես կազմակերպության է վերածվում»,- հաղորդման շրջանակներում նշել է քահանա Արթենյանը։