Աղաղակող փաստերի և իրողության դեմ ադրբեջանցիների ճամարտակությունները դատապարտված էին ձախողման. Արփինե Հովհաննիսյան

Ազգային ժողովի պատգամավոր, ԵԽԽՎ հայաստանյան պատվիրակության ղեկավար Արփինե Հովհաննիսյանը ներկայացրել է ԵԽԽՎ իրավական հարցերի հանձնաժողովի նիստի մանրամասները, որի ժամանակ ընդունվել է Ռամիլ Սաֆարովի արտահանձնումը դատապարտող բանաձևը: Պատգամավորն իր ֆեյսբուքյան էջում գրել է.

«Հարգելի գործընկերներ, մայիսի 26-27-ին Հելսինկիում տեղի ունեցավ ԵԽԽվ իրավական հարցերով հանձնաժողովի նիստը: Նիստի օրակարգում ներառված էր նաև «Դատապարտված անձանց փոխանցման մասին» կոնվենցիայի չարաշահումը կանխարգելելու միջոցառումների մասին» ԵԽԽՎ բանաձևի նախագիծը: Այն վերաբերում էր ադրբեջանցի մարդասպան Ռամիլ Սաֆարովի արտահանձնման խնդրին: Բանաձևն ըստ էության փաստեց, որ Սաֆարովի արտահանձնումը եղել է կոնվենցիայի չարաշահում և հակասում է բարի կամքի և իրավունքի գերակայության սկզբունքներին:

Բանաձևը փաստում է, որ Ադրբեջ անի կողմից չարաշահվել է կոնվենցիայի 12-րդ հոդվածը, որի նպատակը առավելապես մարդասիրական է, և այն չպետք է օգտագործվի այլ նպատակներով:

Նշեմ, որ ադրբեջանցիները մինչև վերջ էլ չկարողացան հասկանալ և ընդունել, որ աղաղակող փաստերի և իրողության դեմ իրենց ճամարտակությունները դատապարտված էին ձախողման և անգամ այս փուլում, միևնույն է, փորձում էին ամեն ինչ անել բանաձևի ընդունումը տապալելու համար' ներկայացնելով ծիծաղելի հակափաստարկներ:

Շնորհակալ եմ զեկուցողին' անաչառ և անկողմնակալ փաստաթուղթ ներկայացնելու, իսկ եվրոպացի գործընկերներիս' արդարությանը և իրենց խղճին ու համոզմունքներին համապատասխան գնահատականների ու քվեարկության համար»:

Եվրոպայի խորհրդի խորհրդարանական վեհաժողովի Իրավական հարցերի և մարդու իրավունքների հանձնաժողովը դատապարտել է Ադրբեջանի կողմից դատապարտվածների հանձնման վերաբերյալ Եվրոպական կոնվենցիայի 12-րդ հոդվածի կիրառումը Ռամիլ Սաֆարովի գործով` որպես «միջազգային հարաբերություններում և օրենքի գերակայության հարցերում բարեխիղճ մտադրությունների սկզբունքների խախտում»: Բանաձևում նշվում է, որ 12-րդ հոդվածի կիրառման նպատակն է նպաստել ազատազրկման դատապարտվածների վերականգնմանն ու վերաինտեգրմանը: Միաժամանակ, բանաձևում մտահոգություն է հայտնվում, որ կոնվենցիան կիրառվել է Ադրբեջանին հանձնելուց հետո Ռամիլ Սաֆարովի անհապաղ ազատումն արդարացնելու համար:

Բանաձևում հիշեցվում է, որ Սաֆարովը դատապարտվել էր 2004 թվականին Բուդապեշտում տեղի ունեցած ողբերգական դեպքից հետո, երբ ՆԱՏՕ-ի շրջանակներում Հունգարիայի մայրաքաղաք Բուդապեշտում դասընթացներին մասնակցող ադրբեջանցի սպա Ռամիլ Սաֆարովը քնած ժամանակ կացնահարել էր հայազգի սպա Գուրգեն Մարգարյանին: «Եվ ահա, Ադրբեջանում նա ընդունվել է որպես ազգային հերոս, ու դեռևս Հունգարիայի դատարանի կողմից նրա նկատմամբ սահմանված պատժի նվազագույն ժամանակահատվածը չլրացած, նրա նկատմամբ անհապաղ կիրառվեց համաներում, Սաֆարովին արժանացրին տարբեր բարձրաստիճան պարգևների»,- ասված է բանաձևում:

Դրանում ընդգծվում է, որ «12-րդ հոդվածը չի նախատեսում քաղբանտարկյալների արտահանձնումից հետո անհապաղ ազատ արձակում, այլ արտահանձնման դեպքերում ընդգծում է օրենքի գերակայությանը հավատարմությունը, որովհետև այն կարող է առաջացնել քաղաքական ու դիվանագիտական հետևանքներ»:

Բանաձևի նախագիծը կներկայացվի ԵԽԽՎ լիագումար նիստի քննարկմանը 2014 թվականի ընթացքում: