Սոցցանցեր. կեղծարարները փոխել են տեսախցիկներով ցուցադրվող կադրերը

ՌԴ նախագահական ընտրություններին արձանագրված խախտումների մասին հաղորդագրությունների թիվը գնալով աճում է։ Բողոքում են և՛ դիտորդները, և՛ քաղաքացիները։

Հիմնականում սոցցանցերում ակտիվ քննարկվում են «կարուսելների» մասին տեղեկությունները։ Մայրաքաղաքի ընտրատեղամասերից մեկում՝ թիվ 2775-ում, գրանցում չունեցող ընտրողները կարողացել են մասնակցել քվեարկությանը։ Համացանցում լայն տարածում է գտել մի տեսանյութ, որտեղ զինծառայողները քվեարկում են քվեախցերից դուրս՝ հրամանատարական կազմի խիստ վերահսկողության պայմաններում։ Նմանատիպ դեպք է գրանցվել նաև մերձմոսկովյան Բալաշիխայում՝ համար 58 ընտրատեղամասում։

Մագադանում կեղծարարները կեղծել են իրական ժամանակում աշխատող վեբ–տեսախցիկների ցուցադրած կադրերը։ Սոցցանցերի օգտատերերի պնդմամբ քաղաքում արդեն մթնել է, սակայն վեբ–տեսախցիկներով «արձանագրվող» քվեարկությունը տեղի է ունենում ցերեկային լույսի ներքո։ Չուկոտկայում այդ տեսախցիկներն ընդհանրապես անջատվել են, հենց որ սկսվել է ձայների հաշվարկը։