ՃՈ պետը փնտրում է «Նիվայի» վարորդին, ով քաղաքի կենտրոնում մեքենայով աստիճաններն էր մագլցում (տեսանյութ)

Ճանապարհային ոստիկանության պետ Արսեն Արշակյանը ֆեյսբուքյան իր էջում գրել է.

«Ճանապարհային ոստիկանության համար արտոնյալ, կարգազանց ու անպատիժ վարորդներ չկան: Վստահ եմ, որ դրանում համոզվել են և օրինախախտները, և մեր հայրենակիցները: ՃՈ ամենօրյա աշխատանքը բաց է ու տեսանելի նույնիսկ նրանց համար, ովքեր չեն ուզում բարձրաձայն ընդունել փաստը: Սա ամենևին էլ չի նշանակում, որ ճանապարհային ոստիկանության աշխատանքում խնդիրներ չկան: Մեծ եղավ զարմանքս, երբ կիրակնօրյա «Սուր անկյուն» հողորդաշարի ընթացքում ՃՈ առաջին սպայական գումարտակի հասցեին Գագիկ Շամշյանի կողմից մեղադրանք հնչեց: Մի մարդու, ով բոլորից լավ է տեղյակ մեր աշխատանքին, ով ինքն էլ գիշեր ու ցերեկ ականատես է մեր ծառայությանն ու իր ռեպորտաժներում բազմիցս է փաստել, որ ՃՈ համար չկան արտոնյալներ, տուգանվում են ու կարգի հրավիրվում բոլորն առանց խտրականության, հասարակության մեջ զբաղեցրած դիրքից կամ ինչպես ընդունված է ասել «գոլդ համարների» հանգամանքից: Հետևաբար մեզ մեղադրել անգործության մեջ անազնիվ է:

Նախորդ շաբաթ համացանցում տարածվեց մի տեսագրություն, որ «Նիվա» մակնիշի ավտոմեքենան ՀՀ Ազգային պատկերասրահի շենքի հետևի մասում երթևեկել է մայթով: Երևույթը քննադատության տեղիք տվեց: ՃՈ-ում ինչպես և բոլոր մյուս դեպքերում անմիջապես ձեռնամուխ եղան մեքենայի համարանիշը պարզելուն, սակայն տեսագրությամբ այն վերծանել հնարավոր չեղավ: Գ. Շամշյանին անձամբ խնդրել եմ տրամադրել տեսագրության բնօրինակը, լրացուցիչ այլ տվյալներ, սակայն ֆոտոլրագրողն ասել է, որ տեսագրությունն արվել է ոչ իր կողմից և այլ տեղեկույթ չունի: Վստահեցնում եմ, որ ՃՈ աշխատակիցները հնարավոր ամեն ինչ արել են, ցավոք, չի հաջողվել պարզել ավտոմեքենայի պետհամարանիշը, տեսագրության մեջ այն պարզապես չի երևում:

Միշտ բարձր եմ գնահատել ու հարգանքով վերաբերվել լրագրողական աշխատանքին` հիմնված խոսքի ու տառի պատասխանատվության վրա, բայց երբեք չեմ ընդունել անհարկի մեղադրանքը: Դիմում եմ ոչ միայն տեսագրության հեղինակին, այլև մեր մյուս համաքաղաքացիներին, ովքեր հնարավոր է ականատես են եղել մայթով երթևեկող վարորդի «հերոսությանը», եթե տիրապետում եք լրացուցիչ տեղեկատվության, հիշում եք ավտոմեքենայի պետհամարանիշը, ապա տրամադրեք այն Ճանապարհային ոստիկանությանը: Դրանով կօգնեք ոչ միայն մեզ` պատժելու օրինախախտին, ալև կկանխեք հնարավոր այլ օրինազանցում:

Այն տեսակետին եմ, որ հնարավոր դեպքերի ու պատահարների թիվը նվազեցնելու արդյունավետ միջոցներից մեկն էլ այդ ուղղությամբ տեղեկատվական, բացատրական աշխատանք իրականացնելն է: Առիթ ունեցել եմ սոցիալական ցանցով, էլեկտրոնային կայքերով և առհասարակ ԶԼՄ-ներով կոչ անել, հորդորել պահպանել երթևեկության և անվտանգության կանոնները: Կարծում եմ, դա ևս ինչ-որ չափով նպաստում է դեպքերի նախականխմանը»: