Իսրայելը պատրաստ է Իրանի հետ զինված հակամարտությանը. Շիմոն Պերես

Իսրայելը չի ձգտում Իրանի հետ ռազմական հակամարտության, բայց եթե իրադարձություններն այդպես զարգանան, հրեաները կհաղթեն։ Նման համոզմունք է հայտնել Իսրայելի նախագահ Շիմոն Պերեսը, հաղորդում է ИТАР-ТАСС-ը։

«Իսրայելը սարսափելի պատերազմներ է տեսել։ Մենք չենք ձգտում դրան, մենք մշտապես հակված ենք խաղաղության, բայց եթե ստիպված լինենք կռվել, մի՛ կասկածեք՝ հաղթելու ենք»,- ասել է նա։

Պերեսի խոսքերով՝ ԱՄՆ-ը և Իսրայելը կիսում են ընդհանուր մի նպատակ, այն է՝ կասեցնել Իրանում միջուկային զենքի ստեղծումը։ Այդ հարցում, ըստ նրա, երկու պետությունների միջև տարաձայնություններ չկան։ 

«Իրանի հավակնություններն ուղղված են Մերձավոր Արևելքում գերիշխանության հաստատմանը, որպեսզի այդպիսով ղեկավարվի համաշխարհային տնտեսության էական մասը։ Իրանին պետք է կանգնեցնել, և նրան կանգնեցնելու են»,- հավելել է Պերեսը։ 

Իր հերթին, ԱՄՆ նախագահ Բարաք Օբաման համոզմունք է հայտնել, որ խնդիրը դիվանագիտական ճանապարհով լուծելու համար դեռևս ժամանակ կա՝ ընդգծելով, որ անհրաժեշտության դեպքում ԱՄՆ-ը կկիրառի իր բոլոր հնարավորությունները՝ կասեցնելու համար Իրանում միջուկային զենքի ստեղծումը։