«Կռիվը Սերժի հետ չի, ոչ էլ ՀՀԿ-ի, դուրս ա գալիս սեփական ժողովրդի դեմ եմ հելել». դատարանի բակում կրակոցներ արձակած Հայկ Կյուրեղյան

Ինչպես ավելի վաղ հայտնել էր Լուրեր.com-ը, հունիսի 12-ին մեկնարկող Շանթ Հարությունյանի գործով դատական նիստից րոպեներ առաջ արտակարգ դեպք է տեղի ունեցել դատարանի բակում։ Մի երիտասարդ կանգնել է մեքենայի վրա՝ գազային ատրճանակը ձեռքին ու հայտարարել. «Այստեղ ռումբ է տեղադրված, մեկը չկա՞, որի ինձ գա բռնի»։

Ոստիկանները մոտեցել են նրան, փորձել իջեցնել մեքենայից, սակայն երիտասարդը հանել է զենքը ու սկսեց կրակել ոստիկանների վրա՝ վիրավորելով մի քանի ոստիկանի։

Ավելի ուշ հայտնի դարձավ, որ Երևանի Կենտրոն և Նորք-Մարաշ համայնքների ընդհանուր իրավասության դատարանի բակում կրակոցներ արձակած անձը Հայկ Կյուրեղյանն է: Նրան բերման են ենթարկել Ոստիկանության կենտրոնականի բաժին: Օդամղիչ ատրճանակից նրա արձակած կրակոցներից ոստիկանության հինգ ծառայողներ են վիրավորվել:

Նշենք, որ օրեր առաջ` հունիսի 9-ին, Հայկ Կյուրեղյանը ֆեյսբուքյան իր էջում կատարել էր հետևյալ գրառումը.

«Դուս ա գալիս մենք ընենց մարդկանց համար ենք պայքարում, որ կարողա շատ չէ 5000դրամ փող վերցնեն ու մեզ հենց ճակատից առանց տատանվելու կրակեն:

Ուրեմն մենք ով ենք՝ հիմարներ, մազոխիստներ, թե քրիստոսներ: ես ետ բազմության համար չեմ պայքարում, այլ հենց իրանց դեմ եմ պայքարում: Ու երեվի կռիվը Սերժի հետ չի, ոչ էլ հհկ-ի, ոչ էլ օլիգարխների, դուրս ա

գալիս սեփական ժողովրդի դեմ եմ հելել: Հիմա տենանք ով կկրի ես թե ինքը՝ ինքը հզոր հանրությունը:

կատակում են հայերը ճճճ»:

Հ.Գ. Գրառումը խմբագրված չէ: