Մեր երկրում երկար տարիներ քաղաքական դաշտ գոյություն չի ունեցել. Ժիրայր Սեֆիլյան

Դժբախտաբար, մեր երկրում երկար տարիներ քաղաքական դաշտ դասական իմաստով գոյություն չի ունեցել, ուստի մերօրյա ճահիճում դասական լուծումներ փնտրել հնարավոր չէ։ Այդ մասին այսօր Հայաստանի քաղաքագետների միության իրավիճակային վերլուծությունների և քաղաքական կանխատեսումների ակումբում հրավիրված քննարկումների ժամանակ ասաց «Սարդարապատ» շարժման համակարգող Ժիրայր Սեֆիլյանը:

Խոսելով ընտրությունների մասին մի երկրում, որտեղ ըստ էության քաղաքական դաշտը կայացած չէ, Սեֆիլյանը նշեց. «Բացառությունները հարգելով՝ ուզում եմ ասել, որ մեր քսան տարիների ընթացքում գլխավոր պատճառը, որ այսօրին ենք հասել, դա այն է, որ 1991 թվականից քաղաքական ղեկի մոտ հայտնվեցին մարդիկ, որոնք մեծամասամբ ստրկամիտ անհատականություններ են: Եվ եթե մոտ ապագայում չկարողանանք ստեղծել հայաստանակենտրոն պետություն, ապա մենք ենթակա ենք սնանկացման և լուծարման»։

Ամփոփելով իր խոսքը Սեֆիլյանը նշեց, որ այսօրվա քաղաքական դաշտը՝ դրա իշխանական բուրգով և ենթակա ընդդիմադիր կոչեցյալ ուժերով, ենթարկվում է մի մարդու քմաաճույքի, որի անունն է Սերժիկ Սարգսյան:

Արտակարգ և լիազոր դեսպան Արման Նավասարդյանը, համաձայնելով Ժիրայր Սեֆիլյանի տեսակետի հետ, ասաց. «Ես համաձայն եմ այն տեսակետի հետ, որ անհրաժեշտ է սերնդափոխություն, բայց ժամանակները փոխվել են, Հայաստանը չի վերանա որպես երկիր, այլ կդառնա աֆրիկյան սիմվոլիկ պետություն: Իմ մտավախությունն այն է, որ Հայաստանը չդառնա երկրորդական պետություն»։

«Սարդարապատ» շարժման անդամ Տիգրան Խզմալյանն էլ, խոսելով սերնդափոխության և արյունափոխության մասին, ասաց. «Հայտնի է, որ մեր ազգը կարողանում է սնվել մեր ազգի արյունով: Երբ Սերժ Սարգսյանը հագնում է զինվորական համազգեստ, համազգեստի վրա երևում է նրա արյան խումբը՝ չորրորդ: Իսկ չորրորդ խումբը ունի յուրահատկություն: ՀՀ նախագահը արյուն կարող է ստանալ բոլորից, բայց արյուն տալ որ ոքի չի կարող: Մեր հասարակության մեծ մասը, ինչպես նաև «Սարդարապատ» շարժման մասնակիցների մեծ մասն, ունի մեկ և երկրորդ խմբի արյուն: Այսինքն, արնափոխությունը Հայաստանում կլինի միայն հասարակության ներսից»։

Շարունակելով ընտրությունների թեման՝ Քաղաքագետների միության նախագահ Հմայակ Հովհաննիսյանն էլ ասաց. «Հակահամակարգային ընդդիմությունը մեծ հույսեր չի տածում ընտրությունների նկատմամբ: Սակայն կեղծիքներից խուսափելու ամենաարդյունավետ միջոցը ակտիվ մասնակցությունն է ընտրություններին: Լևոն Տեր-Պետրոսյանը ինստիտուցիոնալ ընդդիմություն է, իսկ «Սարդարապատ»-ն այն մարդկանցով է ներկայացված, որոնք երբևէ չեն եղել իշխանության մեջ։