Էրդողանը` իրաքցի ահաբեկիչների մասին

Թուրքիայի վարչապետ Էրդողանը հանդես է եկել Իրաքի հյուսիսում 11 քաղաքներ զավթած «Իրաքի և Լևանտի իսլամական պետություն» (ԻԼԻՊ) կոչված ահաբեկչական խմբավորման դեմ ռազմական գործողություններ չանցկացվելու մասին տարօրինակ հայտարարությամբ: Ինչպես հաղորդում է թուրքական ԶԼՄ-ները, թուրք լրագրողների հետ հանդիպման ժամանակ Էրդողանն ասել է, որ ԻԼԻՊ-ի զինյալները թաքնվում են խաղաղ բնակչության մեջ և դա բացառում է այդ խմբավորման դեմ որևէ ռազմական գործողության անցկացումը: Նրա խոսքով, ռազմական միջամտությունը կարող է մեծ թվով մարդկանց մահվան պատճառ դառնալ:

Էրդողանն ասել է նաև, որ Իրաքում հակամարտությունը վերածվել է կրոնական աղանդների միջև բախումների: «Իրադարձությունը դուրս է եկել ԻԼԻՊ-ի և Իրաքի բանակի միջև հակամարտություն լինելուց և վերածվել սունի-շիա միջաղանդային պատերազմի: Մենք դա կտրականապես դատապարտում ենք: Մահմեդականները չեն կարող սպանել իրար: Այս պահին մեր միակ խնդիրը ԻԼԻՊ-ի կողմից պատանդ վերցված մեր մոտ 80 քաղաքացիներին հայրենիք վերադարձնելն է»,- ասել է Էրդողանը: