Կիզակետում. մանկական լուսանկարների ցուցահանդես

Երեքշաբթի երեկոյան «Նարեկացի» արվեստի միության ցուցասրահում բացվեց «Կիզակետում» մանկական աշխատանքների լուսանկարչական ցուցահանդեսը:

Ներկայացվել էին Արմավիրի մարզի Մյասնիկյան գյուղի 20 երեխաների լուսանկարներ, ովքեր այս տարվա ամռան և աշնան ամիսներին մասնակցել են «ՍԻ.Օ.ԷՅ.ԷՖ.» Մանուկների բարեգործական հիմնադրամի «Կիզկետում» լուսանկարչական նախագծին: Նախագծի մտահղացման հեղինակն ու համակարգողը, ինչպես նաև ցուցահանդեսի համադրողն է ԱՄՆ-ում բնակվող արվեստի պատմաբան Օքսանա Միրզոյանը: Ցուցադրությունը բաց է մինչև նոյեմբերի 3-ը:

«Կիզակետում»-ը արվեստագիտական նախագիծ է, որն իրականացվել է հասարակական մի շարք խնդիրներ հասցեագրելու մտայնությամբ: Երեխաներին տրամադրելով թվային պարզ լուսանկարչական խցիկներ' նախագիծը ոչ միայն ընձեռել է նրանց լուսանկարչական տարրական հմտություններ ձեռք բերելու հնարավորություն, այլև հատուկ թեմատիկ առաջադրանքներ հանձնարարելու և պարբերաբար անցկացվող խմբակային քննարկումների միջոցով' փորձել է նպաստել շրջապատող աշխարհն աչալուրջ ու քննախույզ հայացքով նկատելու երեխաների կարողությունների զարգացմանը:

«Արվեստը սեփական միջավայրն ու համայնքը յուրօրինակ ձևերով ընկալելու և ըմբռնելու գործիք է: Այն անհատի անձնական զորեղացման միջոց է, որ մարդուն ու մարդկությանը կարող է ուղղորդել ինքնաճանաչման վառ զգացողությունների եզակի արահետներով», - նշում է նախագծի հեղինակ, արվեստի պատմաբան Օքսանա Միրզոյանը:

Չորս ամիս տևած նախագծի շրջանակներում, երեխաներին ամեն շաբաթ հանձնարարվել են թեմաներ, ինչպիսիք են, օրինակ, «պլաստիկ պայուսակներ և աղբ» առաջադրանքը, որոնց միջոցով նախագիծը փորձել է երեխաների մոտ ձևավորել ու զարգացնել հասարակական ու բնապահպանական տարբեր հարցերի վերաբերվող գիտակցություն ու զգոնություն:

«Լուսանկարչական խցիկը որպես աշխարհը սեփական դիտանկյունից պատկերելու ու փոփոխություն ներմուծելու գործիք»,– նախագծի գաղափարական հենքը պարզաբանում է մտաղացման հեղինակ Օքսանա Միրզոյանը, ով ծնվել է Բաքվում 1984 թվականին, այնուհետև՝ Սումգաիթի ջարդերի հետևանքով, տեղափոխվել է Հայաստան, ապա՝ Ռուսաստան, ապա՝ Ամերիկայի Միացյալ Նահանգներ:

Ռուզաննա Միրզոյանը բակալավրի իր կոչումը ստացել է Միչիգանի համալսարանի Արվեստի պատմության ֆակուլտետում, նկարահանվել է անկախ կինոյում, գրում, նկարահանում և բեմադրում է գեղարվեստաէքսպերիմենտալ կարճամետրաժ կինոնկարներ ու երաժշտական հոլովակներ: Այժմ նախնական փուլում են նրա եղինակած երկու կինոնկարները՝ «140 դրամ»-ը և «Մոլորված»-ը, որ Միրզոյանը պատրաստվում է նկարահանել Երևանում: