Էրդողանն անձամբ կհայտարարի նախագահի պաշտոնում իր կուսակցության առաջադրած թեկնածուի անունը

Թուրքիայի իշխող Արդարություն և զարգացում կուսակցությունը հուլիսի 1-ին կհրապարակի նախագահի պաշտոնում առաջադրվելիք իր թեկնածուի անունը: Այս մասին հայտարարել է կուսակցության գլխավոր քարտուղար Հալուք Իփեքը:

Հետաքրքիր է, որ հենց հաջորդ նախագահի ամենահավանական թեկնածուն համարվող ներկայիս վարչապետ Ռեջեփ Թայիփ Էրդողանն էլ հայտարարելու է Արդարություն և զարգացում կուսակցության առաջադրած թեկնածուի անունը:

Թուրքիայում նախագահական ընտրությունները տեղի կունանան օգոստոսի 10-ին: Առաջին անգամ երկրում նախագահին կընտրեն համաժողովրդական քվեարկության միջոցով: Գլխավոր ընդդիմադիր' Ժողովրդահանրապետական (ԺՀԿ) և Ազգայնական շարժում (ԱՇԿ) կուսակցությունները որպես նախագահի միասնական թեկնածու են առաջադրել Էքմելեդդին Իհսանօղլուին: Թուրքիայում կայանալիք նախագահական ընտրություններում իր թեկնածությունն է որոշել առաջադրել 3 երեխաների մայր, 44-ամյա փիլիսոփայության դասախոս Ուլվիե Քաֆալը Օլգունը: Թուրքական օրենսդրության համաձայն' նախագահի թեկնածու առաջադրվելու համար անհրաժեշտ է 20 պատգամավորի ստորագրություն, ինչը հավաքելու համար թուրք կինը բազում նամակներ է ուղարկել, և աջակցություն է ակնկալում պատգամավորներից: