Եվրոպան ականատես է դառում Իլհամ Ալիևի ոչ ադեկվատությանը. Արփինե Հովհաննիսյան

Եվրոպան ականատես է դառում Իլհամ Ալիևի ոչ ադեկվատությանն իր ողջ «հմայքով»: Այս մասին Ֆեյսբուքի իր էջում գրել է ԱԺ ՀՀԿ խմբակցության պատգամավոր, ԵԽԽՎ հայաստանյան պատվիրակության անդամ Արփինե Հովհաննիսյանը՝ անդրադառնալով ԵԽԽՎ-ում Ադրբեջանի նախագահ Իլհամ Ալիևի ելույթին և դրանից հետ հնչող քննադատական հարցերին և դիտարկումներին:

«Եվ այսպես. ԵԽԽՎ, 2014 թվական հունիսի 24. Եվրոպան ականատես է Ալիևի ոչ ադեկվատությանը իր ողջ հմայքով: Նրա ելույթը սկսելուց առաջ ԵԽԽՎ նախագահ Անն Բրասյորն իր բացման խոսքում մի քանի կարևոր շեշտադրում արեց, մասնավորապես , որ Ղարաբաղի խնդիրը պետք է լուծվի միայն խաղաղ ճանապարհով, ԵԱՀԿ Մինսկի խմբի շրջանակներում, որ չնայած տնտեսական աճին, եթե երկիրը խնդիր ունի մարդու իրավունքների և ժողովրդավարության հետ, չի հաջողի, և այլն: Ինչպես ասում են' «…բայց ում ես ինչ ասում», Ալիևը չափազանց շատ էր նեղսրտում, երբ իրեն հարցնում էին երկրում քաղբանտարկյալների առկայությունից, խոսքի ազատության բացակայությունից և այլ ցավոտ հարցերից, այնքան որ սկսեց մատ թափ տալ եվրոպացիների վրա»,- գրել է պատգամավորը:

Իլհամ Ալիևի ելույթը կապված է ԵԽ Նախարարների կոմիտեում հետագա վեց ամիսը նախագահելու հետ: Իլհամ Ալիևի ելույթն ընդմիջվեց տհաճ միջադեպով. ներս խուժեցին սև ժապավենով փակած բերաններով ու կրծքներին քաղբանտարկյալների նկարներ փակցված մի խումբ երիտասարդներ, ովքեր ելույթի ողջ ընթացքում մնացին դահլիճում և հավանության նշաններ էին անում, երբ հարցերը վերաբերում էին քաղբանտարկյալներին, բանտարկված լրագրողներին, նաև' Լեյլա Յունուսին:

Եվրապատվիրակներից քչերն էին Ալիևին հաճոյանալու արտահայտություններ անում, շատերի հարցերը վերաբերում էին այդ երկրում մարդու իրավունքների ու հիմնարար ազատությունների խախտումներին: