Սիրիական գյուղերից մեկում զինադադար է կնքվել կառավարական ուժերի և զինյալների միջև

Սիրիական բանակի և զինված խմբավորումների միջև համաձայնություն է կնքվել Հոմսի Ուաար թաղամասում կրակը դադարեցնելու վերաբերյալ: Զինադադարը հունիսի 27-ից ուժի մեջ է մտել և կպահպանվի Ռամադան ամսվա ընթացքում:

Սիրիական բանակը հունիսի 27-ին ամբողջովին վերահսկողություն է հաստատել Հալեպի մերձակայքում գտնվող Բեյթ Ջունեյդ կոչվող տեղանքի և երրորդ շրջանի էլեկտրամատակարարման կայանի վրա՝ ոչնչացնելով այնտեղ գտնվող զինյալների վերջին թաքստոցները:

Ռազմական աղբյուրները տեղեկացնում են, որ բանակի ստորաբաժանումները զինյալների թաքստոցներ են ոչնչացրել Հալեպի Մարաա, Մանսուրա, Քաֆր Համրա, Թել Ռաֆաաթ, Խան Տուման, Դեր Հաֆր, ալ Լիրմուն, Սինաիա, Շաար բնակավայրերում: Ոչնչացվել են նրանց պատկանող զենքերը:

«Ալ Ջազիրան» տեղեկացնում է, որ Ջամիա Զահրա թաղամասում թեժ մարտեր են ընթանում: Կառավարական օդուժը ռմբակոծում է թաղամասը:

Աղբյուրը տեղեկացնում է, որ Սիրիայի ազատ բանակի տասնյակ զինվորներ են սպանվել Հալեպի Բարիջ գյուղում: Բացի այդ, թեժ մարտեր են ընթանում քաղաքի Դաուար Սախուր շրջանում:

Մարդու իրավունքների պաշտպանության սիրիական կենտրոնի տվյալներով` Սիրիայում հունիսի 26-ին 59 մարդ է զոհվել, որոնց թվում՝ 8 երեխաներ:

Սիրիայում կառավարական ուժերի և զինված ընդդիմադիրների միջև երեք տարուց ավելի շարունակվող բախումների հետևանքով, ՄԱԿ-ի տվյալներով, զոհվել է ավելի քան 150 հազար մարդ, այդ թվում` զոհված հայերի թիվը գերազանցել է 100-ը: