Անհատ նախաձեռնողի ջանքերով չորս ամսվա ընթացքում Քեսաբ է ուղարկվել 33 հազար 515 դոլար

Մերձավոր Արևելք 30 Հունիս, 2014 11:37

Երևանում մարտի կեսերից մեկնարկած քեսաբահայությանն աջակցության նպատակով դրամահավաքի արդյունքում հավաքագրվել է 33 հազար 515 ԱՄՆ դոլար: «Արմենպրես»-ի հետ զրույցում նախաձեռնության հեղինակներից Վարուժան Ավետիքյանն ասաց, որ այդ գումարն օգտագործվել է Սիրիայում և Լիբանանում գտնվող հազարից ավելի քեսաբահայերին աջակցելու համար: «Քեսաբահայերի գերակշիռ հատվածը հարձակումներից հետո տեղափոխվել էր Լաթաքիա: Մի մասն ապաստան էր գտնել բարեկամների մոտ, մյուս մասը շարունակում էր ապրել Լաթաքիայի հայկական եկեղեցու բակում: Այնտեղ բնակվող շուրջ 300 ընտանիք' 944 հոգի, ստացել է դրամական աջակցություն: Յուրաքանչյուր ընտանիք յուրաքանչյուր ամիս ստացել է ավելի քան 500 դոլար' ամսական ծախսերը հոգալու համար»,- ասաց Վարուժան Ավետիքյանը' հավելելով, որ նախապես հաշվարկել էին, թե յուրաքանչյուր ընտանիքի հագուստի, սնունդի, դեղորայքի և բնակարանի վարձակալության համար ամսական որքան գումար է անհրաժեշտ:

Եվս 8 ընտանիք' 14 հոգի' հիմնականում տարեցներ, չէին կարողացել հեռանալ Քեսաբից և նրանց աջակցության համար հիմնադրամը գումարը ուղարկել է Քեսաբ' սնունդ և դեղորայք գնելու համար: «Քեսաբում տեղի ունեցած մարտերի ժամանակ ևս 88 ընտանիք հեռացել էին Լիբանան: Նրանց աջակցելու նպատակով «Ջինիշյան» հիմնադրամը Բեյրութում գործող մասնաճյուղին տրամադել է 5 հազար 380 դոլար: 270 քեսաբահայերի համար տրամադրվել են նաև հատուկ կտրոններ' հագուստ և կոշիկ գնելու համար: Այդ կտրոնները քեսաբահայերը կարող են օգտագործել Բուրջ Համուդի խանութներում»,- ասաց Ավետիքյանը:

Այս պահին հիմնադրամի աշխատակիցները փորձում են նմանատիպ կտրոններով ապահովել նաև Այնճարում ապրող քեսաբահայերին: Ըստ Վարուժան Ավետիքյանի` մի շարք քեսաբահայեր ցանկություն են հայտնել Լիբանանից վերադառնալ Քեսաբ, սակայն անհրաժեշտ դրամական միջոցներ չունեն: Այս պահին հիմնադրամն աշխատում է գումար գտնել ճանապարհածախսը հոգալու համար:

Վարուժան Ավետիքյանի խոսքով` այս պահին Երևանում դրամահավաքությունը ժամանակավորապես դադարեցված է, քանի որ քեսաբահայերից շատերը ցանկանում են վերադառնալ իրենց բնակարանները, և այժմ նախաձեռնության հեղինակները փորձում են հասկանալ, թե ինչպես և ինչով կարող են օգնել նրանց: Ինչ վերաբերում է Հայաստանում և Արցախում քեսբահայերի հաստատման համար նախագծի ներկայացմանը, ապա այն դեռ քննարկման և մշակման փուլում է, քանի որ քեսաբահայերի մեծամասնությունը Հայաստան գալու ցանկություն չի հայտնել: «Նրանք ցանկանում են վերադառնալ իրենց գյուղը, իրենց բնակարանները և այս պահին հիմնադրամի աշխատակիցները փորձում են հասկանալ, թե ինչի կարիք ունեն նրանք և հայությունն ինչով կարող է օգնել նրանց»,- ասաց Ավետիքյանը' հավելելով, որ տեխնիկական հարցերի կարգավորումից հետո անհրաժեշտության դեպքում կրկին կազդարարեն դրամահավաքության և քեսաբահայերին աջակցության ծրագրերի մասին:

Թուրքիայի աջակցությամբ սիրիական զինյալների կողմից մարտի 21-ին գրավվել էր հայաբնակ Քեսաբը, որը Սիրիայի կառավարական ուժերի կողմից ազատագրվել է հունիսի 16-ին: Քաղաքում դեռևս լիակատար կենսապայմաններ ապահովված չեն, քանի որ այն ավերվել էր ամիսներ շարունակվող բախումների արդյունքում: