«Արմավիա» ավիաընկերությունը վերսկսել է իր չվերթները

««Արմենիա» միջազգային օդանավակայաններ» ընկերությունը հաղորդագրություն է տարածել, որով տեղեկացնում է, որ «Արմավիա» ավիաընկերությունը վերսկսել է իր չվերթների սպասարկումը: ««Արմենիա» միջազգային օդանավակայանները» հղում անելով իր ունեցած տվյալներին, տեղեկացնում է, որ «Արմավիա» ավիաընկերությունը համաձայնության է եկել «Ռոսավիացիա» կազմակերպության հետ պարտքի շուրջ:

«Այսօր ՀՀ Քաղաքացիական Ավիացիայի Գլխավոր Վարչությունում հանդիպում է տեղի ունեցել ««Արմենիա» միջազգային օդանավակայաններ» ՓԲԸ-ի և Արմավիա ավիաընկերության ներկայացուցիչների միջև: Որոշվել է ևս մեկ հանդիպում անցկացնել առաջիկա երեքշաբթի օրը:

Հուսով ենք առաջիկայում ինչպես մյուս ավիաընկերությունների, այնպես էլ «Արմավիա» ավիաընկերության ուղևորները կսպասարկվեն ժամանակին, առանց խափանումների,հավուր պատշաճի»,– նշված է տարածված հաղորդագրության մեջ:

Հիշեցնենք, որ այսօր տեղեկատվություն էր տարածվել այն մասին, թե «Արմավիա» ավիաընկերությունն անժամկետ գործադուլ է հայտարարել: Արմավիայի մամլո ծառայությունից հայտնել էին, որ գործադուլը չի դադարեցվելու այնքան ժամանակ, քանի դեռ Երևանի Զվարթնոց միջազգային օդանավակայանը չվերանայի իր գնային քաղաքականությունը: Սակայն ««Արմենիա» միջազգային օդանավակայաններ» ընկերությունը հաղորդագրություն էր տարածել, որում ասված էր, թե «Արմավիա» ավիաընկերության տարածած տեղեկատվությունն այն մասին, որ իրենք անժամկետ գործադուլ են հայտարարում՝ իրենց նկատմամբ օդանավակայանի գնային քաղաքականության պատճառով, իրականությանը չեն համապատասխանում: Հաղորդագրությունում ասված էր, որ կուտակված պարտքերի պատճառով «Արմավիա» ավիաընկերությանն արգելվում է թռիչքներ իրականացնել դեպի Ռուսաստան և մուտք գործել Ռուսաստանի օդային տարածք: