Հալեպի բնակիչներին կոչ է արվել անվստահելի աղբյուրներից ջուր չըմպել

Հալեպում կոչ է ուղղվել բնակչությանը' անվստահելի աղբյուրներից ջուր չըմպել՝ այդպիսով խուսափելով տարբեր հիվանդություններից: Աշխարհի ամենավտանգավոր պատերազմներից մեկի ճիրաններում գտնվող քաղաքը հրասանդների, գազի տակառների և զանազան տեսակի հրթիռների արձակումների պատճառած ահ ու սարսափի, ավերի կողքին տարիներ շարունակ դիմագրավում է նաև կենցաղային դժվարություններ: Ինչպես հաղորդում է «Բերիո Լուրեր» ֆեյսբուքյան էջը, ամիսներ շարունակ Հալեպում ջրի ընկերության կողմից ջրամատակարարման դադարեցման պատճառով հերթականությամբ է ջուրը մատակարարվում քաղաքի տարբեր շրջաններում: Քաղաքի տարբեր կառույցներ, մզկիթներ, որոշ շենքեր, այդ թվում նաև հայկական ակումբները, կենտրոնները և եկեղեցիները, որոնք ջրհորներ և ջրամբարներ ունեն, շարունակում են անվճար ջրի մատակարարման ծառայություն կատարել:

Հայաշատ Սուլեյմանիե թաղամասում «Սիմոն Վրացյան» կենտրոնի նախաձեռնությամբ Գյուլբենկյան վարժարանից ջրամատակարարում է կատարվում, խմելու կամ ոչ խմելու ջրի: Օրեր շարունակ հազարավոր բնակիչներ անխտիր առանց կարգ ու կանոն խախտելու անվճար ստանում են իրենց անհրաժեշտ ջրի քանակը: «Սիմոն Վրացյան» կենտրոնի անդամներն օրական 7-9 ժամ տևողությամբ ջուր են բաժանում: Ջրամատակարարումը կատարվում է նույնիսկ ջրամբարներով:

Վերջին երկու ամիսների ընթացքում Հալեպում տասնյակից ավելի հայեր են զոհվել և վիրավորվել: Սիրիական հակամարտության 3-ից ավելի տարիների ընթացքում զոհված հայերի թիվը գերազանցել է 100-ը: Մասնավորապես հունիսի առաջին օրերից սկսած՝ Հալեպում և հատկապես հայկական Նոր գյուղ թաղամասում իրավիճակը կտրուկ վատացել էր: Ահաբեկիչ խմբավորումների հարձակումների հետևանքով Նոր գյուղում մեծաթիվ բնակարաններ բոլորովին անբնակելի են դարձել, իսկ հարյուրավոր բնակարաններ նորոգելու կարիք ունեն: Երբեմնի հայաշատ Նոր գյուղ թաղամասն այսօր աղետալի շրջան է, ամայացած ու ավերակ: Նոր գյուղը և հալեպահայությունը կործանման վտանգի առջև են կանգնել...

Կոչ է ուղղվել համայն հայությանը՝ բոլոր միջոցներով սատար կանգնել ի նպաստ անմարդկային հրթիռաձգության կասեցման՝ հանուն աղետահար ժողովրդի ֆիզիկական անվտանգության ապահովման: