Թուրքիայում հրապարկվել է նախագահական ընտրություններում թեկնածուների պաշտոնական ցուցակը. Resmi

Թուրքիայի Resmi պաշտոնական թերթը հրապարակել է 2014 թվականի օգոստոսի 10-ին այդ երկրում անցկացվելիք հերթական նախագահական ընտրություններում առաջադրված թեկնածուների պաշտոնական ցուցակը, որը ներկայացրել է Թուրքիայի կենտրոնական ընտրական հանձնաժողովը:

Ինչպես հաղորդում է «Արմենպրես»-ը, Թուրքիայի նախագահի պաշտոնում ընտրվելու համար թեկնածու է առաջադրվել գործող վարչապետ Ռեջեփ Թայիփ Էրդողանը՝ իշխող «Արդարություն և զարգացում» կուսակցությունից, Էքմելեդդին Մեհմեթ Իհսանօղլուն' ընդդիմության միասնական թեկնածու (Ժողովրդահանրապետական կուսակցություն և «Ազգայնական շարժում» կուսակցություն) և ազգությամբ քուրդ Սելահեթդին Դեմիրթաշը' «Ժողովուրդների դեմոկրատական կուսակցությունից»:

Առաջիկա նախագահական ընտրություններում Թուրքիայի պատմության մեջ առաջին անգամ երկրի նախագահը պետք է ընտրվի 5 տարի պաշտոնավարման ժամկետով' համաժողովրդական քվեարկության միջոցով: Մինչ այժմ Թուրքիայի նախագահն ընտրվում էր խորհրդարանի կողմից 7 տարի պաշտոնավարման ժամկետով:

Նշվում է, որ եթե առաջին փուլում թեկնածուներից ոչ մեկը չհավաքի ընտրողների 50 տոկոսից ավելի, ապա երկրորդ փուլը կանցկացվի օգոստոսի 24-ին: