Հայաստանը պաշտոնապես հրաժարվեց մասնակցել «Եվրատեսիլ 2012»–ին

Հայաստանի Հանրային հեռուսատեսությունը պաշտոնապես հայտարարել է, որ Հայաստանը չի մասնակցի Բաքվում տեղի ունեցող «Եվրատեսիլի» այս տարվա միջոցառմանը: Այս մասին այսօր՝ մարտի 7-ին տեղեկություն է հրապարակվել «Եվրատեսիլի» պաշտոնական կայքում։

«Մենք խորապես հիասթափված ենք այս որոշումից»,- նշել է մրցույթի գործադիր ղեկավար Ջոն Օլա Սանդը, հավելելով, որ չնայած իրենց բազմաթիվ ջանքերին, հայկական կողմը հրաժարվել է իր պատվիրակությունն ուղարկել Բաքու:

Նշվում է, որ այս տարվա մրցույթին 43 պետությունների փոխարեն կմասնակցեն 42-ը: Յուրաքանչյուր կիսաեզրափակիչում կմրցեն 18 երկրների ներկայացուցիչներ: Եզրափակիչում նրանց կմիանան Ֆրանսիան, Գերմանիան, Մեծ Բրիտանիան, Իտալիան, Իսպանիան և Ադրբեջանը:

Հիշեցնենք, որ մինչ այս պաշտոնական հայտարարությունը, փետրվարի 23–ին մի շարք հայ երգիչ–երգչուհիներ հանդես եկան հայտարարությամբ, որով կոչ էին անում Հայաստանի հանրային հեռուստատեսությանը բոյկոտել մայիսին Բաքվում կայանալիք «Եվրատեսիլ 2012» մրցույթը։ «Մենք հրաժարվում ենք ելույթ ունենալ մի երկրում, որը հայտնի է հայերի զանգվածային ջարդերով ու կոտորածներով, մի երկրում, որտեղ հայատյացությունը հասցված է պետական քաղաքականության մակարդակի, մի երկրում, ուր մուտքն արգելված է ազգությամբ հայ որևէ մեկի համար, եթե նույնիսկ նա այլ երկրի քաղաքացի է, ինչին ականատես ենք լինում գրեթե յուրաքանչյուր ամիս»,– մասնավորապես ասված էր հայտարարության մեջ։

Այս հայտարարությունից հետո կարելի էր ենթադրել, որ վերջնական պաշտոնական որոշումը բացասական է լինելու։

Թերթ.am