«Երևան ջուր» ընկերության պատճառով քոլեջն ու բնակելի հանրակացարանը ջրազրկվել են (լուսանկար)

Երևանի տարածաշրջանային թիվ 1 պետական Քոլեջի տնօրեն Պարույր Սանթրոսյանը ֆեյսբուքյան իր էջում գրել է.

«Համբերությունն էլ սահման ունի։

Երևանի տարածաշրջանային թիվ 1 պետական Քոլեջը գտնվում է Թբիլիսյան խճուղի 3/1 հասցեում։ Մեկ ամիս առաջ քոլեջի հարակից տարածքում սկսվեցին ինչ-որ աշխատանքներ, որի պատվիրատուն, ինչպես գրված է համապատասխան տեղեկատվական վահանակի վրա ՝ «Երևան ջուրն է», աշխատանքներ իրականացնող կազմակերպությունը՝ «Շինմաստեր» կազմակերպությունը։ Աշխատանքների սկսման օրվանից Քոլեջի շենքը և Թբիլիսյան խճուղի 3/2 հասցեում գտնվող բնակելի հանրակացարանը ջրազրկվեցին։ 10-15 օր անջուր մնալուց հետո, ի դեպ ասեմ, որ չնայած արձակուրդներ են, հենց այս պահին քոլեջում մասնագիտական կրթության դասընթացներ են անցնում «Զբաղվածության պետական ծառայություն,, գործակալության ավելի քան 60 գործազուրկներ, զանգահարեցինք Երևան ջրի միակ՝ 1-85 հեռախոսահամարով։ Խորհուրդ տվեցին գրավոր դիմել Երևան Ջրի տնօրենին։ Դիմեցինք։

Պատասխանում պահանջվող փաստաթղթերը ներկայացրեցինք։ Հետո այցելեցինք արդեն Արաբկիր ջրի մասնաճյուղ որևէ պատասխան ստանալու ակնկալիքով։ Պատասխանեցին, որ կուղարկեն մասնագետի։ Մի քանի օր էլ անջուր մնացինք մասնագետին սպասելով։ Մեր բոլոր բացատրությունները, որ խնդիրը մեր տարածքից չի, ջուրը քոլեջի տարածք չի հասնում, խնդիրը մինչև քոլեջ հասնող խողովակաշարի մեջ է, ջրի պատասխանատուներին համոզիչ չէին թվում։ Անցավ ևս տասը օր։ Վերջապես բարեհաճեցին սպասված մանագետները, համոզվեցին, որ խնդիրը քոլեջի տարածքում չէ ու էլի .... անհետացան։ Պարզվեց, որ վթարի վայրը գտնելու համար պետք է մեր կազմակերպությունը հրավիրի համապատասխան լաբորատորիա ու վճարի դրա համար։ Հիմա ես մտածում եմ, եթե վթարը քոլեջի տարածքում չէ, ինչո՞ւ պիտի պետական ուսումնական հաստատությունը վճարի Երևան ջրի լաբորատորիային։ Եթե պարզվի, որ խնդիրը Գառնու ջրամբարում է, քոլեջը ի՞նչ անի' վճարի Գառնու ջրամբարից մինչև քոլեջ խողովակաշարի վերականգնման համար։ Աբսուրդ է ստացվում։Ստիպված դիմում եմ իմ լրագրող ընկերներին։ Չորրորդ իշխանություն եք բարեկամներս, օգտագործեք ձեր մասնագիտական լծակներն ու գուցե 500 ուսանող ու յոթանասունից ավելի աշխատակից ունեցող հաստատության նկատմամբ, նաև պայմանագրային պարտականություններ ունեցող ջրային տնտեսությունը կատարի՞ իր գործառույթները։ Անկեղծ ասած ձեզ դիմում եմ անզորությունից։ Ելքը չեմ գտնում։

Մեր ամեն առավոտը սկսվում է 1-85 կամ Արաբիր ջուր զանգահարելով, որտեղից մուննաթից ու «ինչ ուզում եք արեք»- ից բացի պատասխան չենք ստանում։

Տեղադրում եմ մեկ ամսից ավելի հարակից քանդված տարածքի նկարներն ու Երևան ջրի տնօրենի պատասխանը։

Հ.Գ. Մի քանի օր առաջ զանգահարեցին ջրի գումարների գանձման բաժնից ու ասացին, որ 6000 դրամ անցած ամսվա ջրի պարտք ունենք։ Չգիտես խնդաս թե լաս»։