Մթերումների սեզոնն ավարտված է

Այսօրվա «Սլաք» մամուլի ակումբի ասուլիսի հյուրը գյուղատնտեսության փոխնախարար Ռոբերտ Մակարյանն էր։ «Այս տարի ապրիլին բանջարեղեն, կաթ ու խաղող վերամշակող կազմակերպությունների համար կոնֆերանսներ անցկացվեց։

Նպատակն էժան վարկերի տրամադրումն էր, որպեսզի վերամշակող ձեռնարկությունները կարողանան ներդրումներ անել գործի մեջ։ Ապա մայիսին հանդիպում եղավ խոշոր մշակողների հետ ու հանձնարարականներ տրվեցին նրանց։ Կազմակերպվեցին տարբեր հանդիպումներ, պայմանավորվածություններ ձեռք բերվեց, եղան գործի համար պատրաստակամության հայտնողներ»,–ասաց գյուղատնտեսության փոխնախարարը։

Մանրամասնելով գյուղատնտեսական ապրանքների այս և անցյալ տարվա տվյալները՝ Մակարյանը պարզաբանեց, որ այս տարին ավելի արդյունավետ տարի է գրանցվել։ Մասնավորապես խաղողի մթերման նվազագույն գինը 130 դրամ է, իսկ անցած տարի եղել է 124,4 դրամ։ Իսկ դա նշանակում է, որ գյուղացին կարողացել է իր աշխատանքից ավելի մեծ օգուտ քաղել։

«Կասյանի գյուղամթերքի տոնավաճառը հուլիսից գործում է, ուզում էինք հիմնել այդպիսի տոնավաճառներ, սակայն գյուղացիների խնդրանքով դեռ նույն տեղում տոնավաճառները շարունակվում են, ուր այցելում են ամեն անգամ օրական չորսից վեց հազար մարդ։ Սկսած կշեռքներից, վերջացրած վրաններով գյուղացին ստանում է անվճար, հետևաբար կարողանում է իջնել գնի մեջ կամ ավել կշռել գնված ապրանքը»,– ասաց Ռոբերտ Մակարյանը։