Բրեյվիկը պաշտոնապես մեղադրվել է ահաբեկչության մեջ

Նորվեգացի Անդերս Բրեյվիկը, որը համաձայնվել է անցյալ տարվա հուլիսին 77 մարդ սպանելու փաստի հետ, պաշտոնապես մեղադրվել է ահաբեկչության մեջ, հաղորդում է BBC Russian-ը։

2011–ի հուլիսի 22–ին Օսլոյի կենտրոնում պայթյուն էր տեղի ունեցել, իսկ Ուտոյա կղզում մեկ ժամ տևած հրաձգության արդյունքում երիտասարդական ճամբարում հանգստացող 69 երիտասարդ էր զոհվել նրա ձեռքից։

Բրեյվիկը ստանձնել էր Օսլոյում և Ուտոյա կղզում կատարած հարձակումների պատասխանատվությունը, սակայն մերժել էր դատախազության կողմից ահաբեկչություն կատարելու մեղադրանքները։ Վերջինս չի հերքում սպանություն կատարելու փաստերը, բայց շարունակում է պնդել, որ այդ դաժան արարքը կատարել է Եվրոպան «մահմեդականների ներխուժումից» պաշտպանելու համար։

Այս դեպքում, փորձագետները, որոնք հոգեբանական փորձաքննություն էին ենթարկել նորվեգացուն, հակասական եզրակացությունների էին հանգել։ Սկզբում նրանք որոշել էին, որ Բրեյվիկը խելագար է, սակայն ավելի ուշ նրան պատասխանատվության ենթարկելու որոշում էր կայացվել։