Թուրքական պետությունը պետք է ներողություն խնդրի հայերից. Թուրքիայի նախագահի թեկնածու

Թուրքիայում օգոստոսին անցկացվելիք նախագահական ընտրություններում «Ժողովուրդների դեմոկրատական կուսակցության» (HDP) նախագահի թեկնածու Սալահեթդին Դեմիրթաշը հայտարարել է, որ թուրքական պետությունը պետք է ներողություն խնդրի հայերից, հույներից և հրեաներից' պատմության ընթացքում նրանց պատճառած ցավերի համար: Ինչպես հաղորդում է «Արմենպրես»-ը' վկայակոչելով korhaber.com լրատվական կայքը, Դեմիրթաշն այդ մասին ասել է Թուրքիայի հայ, ասորի, հույն և հրեա համայնքների ներկայացուցիչների հետ ունեցած հանդիպման ժամանակ:

Թուրքիայի ազգային-կրոնական փոքրամասնությունների ներկայացուցիչների հետ հանդիպմանը, որոնք կազմում են Թուրքիայի ընդհանուր բնակչության ընդամենը 0,8 տոկոսը, նախագահի թեկնածուն պատմել է, որ մեծացել է հայկական թաղամասում, և մանուկ հասակից ականատես է եղել Թուրքիայում հայերի և այլազգիների նկատմամբ դրսևորվող խտրականություններին: Դեմիրթաշը խեստացել է ոչ մի դեպքում զենք չվերցնել և ամեն կերպ պայքարել բռնության դեմ:

«Ուզում եմ ասել, որ այս պետությունը հայերին, հույներին և հրեաներին ներողություն հայտնելու «պարտք» ունի: Այս ներողությունը կարևոր է իմաստային և այն առումով, որ երաշխիք է՝ այս հողերում դարձյալ Ցեղասպանություն չիրագործվելու համար: Մինչև սա չլինի, խոսք չի կարող լինել մնայուն խաղաղության մասին: Ներողություն խնդրելու «պարտքը» պետությանն է, ոչ թե թուրք ժողովրդինը»,- ասել է Թուրքիայի նախագահի թեկնածուն:

Քրդամետ HDP-ի Թուքիայի նախագահի թեկնածու Դեմիրթաշը, ով ազգությամբ զազա քուրդ է, մինչ թեկնածու առաջադրվելը հանդես է եկել Հայոց ցեղասպանությունը Թուրքիայի կողմից ճանաչելու և հայ ժողովրդից ներողություն խնդրելու հայտարարություններով: