«Հայկական Ժամանակ». «Ժառանգության» ու «Ազատ դեմոկրատներ»-ի «բազարները»

«Ժառանգություն» կուսակցության համագումարից հետո թերթին հասնող տեղեկությունները վկայում են, որ 2 կուսակցությունների բանակցություններում նորից իրավիճակ է փոխվել, ինչի պատճառով էլ վերջին օրերին նորից անորոշ են խոսում դաշինքի մասին: Խնդիրը ծագել է, երբ սկսվել է դաշինքի ցուցակի քննարկումը: «Ազատ դեմոկրատները», իհարկե, չեն վիճարկում, որ առաջին տեղում լինի Րաֆֆի Հովհաննիսյանը, բայց պնդում են, որ նրան հաջորդեն 2 «դեմոկրատական»՝ Խաչատուր Քոքոբելյանն ու Անուշ Սեդրակյանը, որից հետո ցուցակը շարունակվի յուրաքանչյուր կուսակցությունից մեկը սկզբունքով: Այս պարագայում ցուցակի մինչև 8-րդ տեղը զբաղեցնում են Ռուբիկ Հակոբյանը, Ալեքսանդր Արզումանյանը, Լարիսա Ալավերդյանը, Արարատ Զուրաբյանը, Ստեփան Սաֆարյանը: Արմեն Մարտիրոսյանը, այսպիսով, հայտնվում է 9-րդ տեղում, ինչը և եղել է վեճի առիթ:

Ըստ թերթի տեղեկությունների, Մարտիրոսյանը պնդում է, որ 9-րդ տեղում լինի Անուշ Սեդրակյանը, իսկ ինքը բարձրանա ցուցակի 3-րդ համար, մանավանդ որ՝ 9-րդը անցողիկ չէ: Նրանք ընդհանուր հայտարարի չեն գալիս, քանի որ «Ազատ դեմոկրատները» 3-րդ տեղը չեն ուզում զիջել: Ըստ «ՀԺ»-ի տեղեկությունների, սա բանակցային փակուղու միակ պատճառը չէ: Ինչպես երևում է, այս ցուցակի դեպքում Աժ-ում հայտնվելու հնարավորությունից զրկվում է նաև Զարուհի Փոստանջյանը, որն անկասկած ավելի մեծ քաղաքական կշիռ ունի, քան Անուշ Սեդրակյանը: Մյուս կողմից, այս անգամ պատգամավոր դառնալու հավակնություն ուներ նաև «Ժառանգության» մամլո խոսնակ Հովսեփ Խուրշուդյանը, իսկ նշված միավորման դեպքում այդ հեռանկարը զրոյանում է: Ահա թե ինչու, ըստ որոշ տեղեկությունների, «Ժառանգության» սրտով չէ «Ազատ դեմոկրատների» հետ միավորումը: Այս լուրերը երեկ ԶԼՄ-ների հետ զրույցում հերքել է «Ժառանգություն» խմբակցության ղեկավար Ստեփան Սաֆարյանը:Կապրենք՝ կտեսնենք, թե ինչով կավարտվի այս ամենը: