«Երկիր». Բանակի տոտալ դեբիլացում՝ ՀՀԿ-ական գաղափարախոսությամբ

Դեգրադացման գործընթացները Հայաստանում սաստկանում են: Եթե ՀՀԿ-ին հաջողվի մինչև վերջ (մինչև մայիսի 5-ը) իրականացնել համընդհանուր դեգրադացման իր այս քաղաքականությունը, ապա մենք մայիսի 6-ին կունենանք հիրավի աննախադեպ ընտրություններ:

Ո՞վ էր տեսել, մտնեն Հայոց բանակի զորամաս և ՀՀԿ նախընտրական ծրագիր ներկայացնեն, տեղում ընարակաշառք տան ձրի ռեպետիտորության տեսքով ու հեռանան, իբր ոչինչ էլ տեղի չի ունեցել: Լավ, մեր երկրում մի լծակ չկա՞, որ գործադրվի սրա դեմ: Հակառակ դեպքում Սահմանադրությունը ասում է, որ բոլորն են ազատ քարոզչություն իրականացնելու հարցում: Թող բարի լինեն, ուրեմն, հնարավորություն տան նաև մյուս քաղաքական ուժերին` զորամասերում իրենց կուսակցությունների նախընտրական ծրագրերը ներկայացնելու: Այլապես ի՞նչ է ստացվում` բանակի տոտալ դեբիլացում ՀՀԿ-ական գաղափարախոսությամբ, մի բան, որ հարիր էր միայն սովետական ժամանակներին, երբ իշխում էր բացառապես մարքսիզմ-լենինիզմ-բրեժնևիզմը: Համաձայնեք, որ սա շատ տխուր երևույթ է, որպեսզի սրա մասին այսպես հպանցիկ խոսենք ու անցնենք առաջ: Նույնիսկ ավելի տխուր, քան ուսումնական հաստատություններում ՀՀԿ տոմսեր բաժանելը, շատ ավելի տխուր, քան, ընտրարշավը չսկսած, փուչիկներով զարդարված կանաչ ավտոբուսով մարզերն ընկնելն ու քարոզելը: Այն էլ՝ պետական միջոցներով:

Իսկ ի՞նչ անուն կտայիք այն պրոցեսին, երբ որևէ կուսակցություն իր համագումարին հրավիրում է նախագահ Սերժ Սարգսյանին (ՀՀԿ նախագահին) և, բոլոր բարձրախոսները միացրած, գոռում, որ իր գոյության ողջ իմաստը Սերժ Սարգսյանին և նրա ղեկավարած կուսակցությանը սատարելն է, ընտրություններում նրանց հաղթանակների համար մեռնելը: Սա բառիս բուն իմաստով քաղաքական նոնսենս է: