«Հայկական ժամանակ». ՍԴ նախագահ Գագիկ Հարությունյանն օլիգարխի կյանք է վարում

ՀՀ ՍԴ նախագահ Գագիկ Հարությունյանն օլիգարխի կյանք է վարում: Նա շրջում է «Audi Q7» մակնիշի ավտոմեքենայով, որի շուկայական արժեքը Հայաստանում, ըստ փորձագետների, 80-ից 150 հազար դոլար է: Կոնկրետ ավտոմեքենայի արժեքը պայմանավորված է նրա շարժիչի հզորությամբ և հագեցվածությամբ: Մասնավորապես, եթե «Audi Q7»-ի շարժիչը 4.2 լիտր աշխատանքային ծավալով է, նշանակում է' այդ ավտոմեքենան մոդելի գերհագեցած կամ, ինչպես ընդունված է ասել, «ֆուլ» և ամենաթանկարժեք տարբերակն է: Գագիկ Հարությունյանի ծառայողական ավտոմեքենան հենց այդպիսին է: Ավելին, ԱԴ նախագահի «Audi Q7»-ի դիմապակուն բացակայում է ԱՊՊԱ կտրոնը, ինչը ՀՀ օրենսդրությամբ պարտադիր է բոլորի համար: Ամեն օր ՍԴ նախագահը երթևեկում է' խախտելով ՀՀ օրենսդրությունը, և երկրում չի գտնվում գեթ մեկ ճանապարհային ոստիկան, որ երկրի ԱԴ նախագահին բերի օրենքի դաշտ: Այսինքն, սովորական ուչաստկովիի այս գործը չի արվում: Երեկ ԱԴ-ից այդպես էլ չի հաջողվել պարզել, թե Գագիկ Հարությունյանի ծառայողական «Audi Q7»-ը ինչ գնով է ձեռք բերվել: ՍԴ նախագահի մամուլի քարտուղար Հովհաննես Պապիկյանը թերթի թղթակցին ասել է, որ ավտոմեքենայի հետ կապված հարցերին իրենց աշխատակազմից պետք է պատասխանեն: ՍԴ աշխատակազմի ղեկավար Առուշան Հակոբյանի հետ հաջողվել է կապվել միայն աշխատանքային ժամի ավարտից հետո: Նա հայտարարել էր, թե ինքը միջոցառման է (ՍԴ կոլեկտիվով մարտի 8-ը նշելիս են եղել) և հրաժարվել է ավտոմեքենայի վերաբերյալ կոնկրետ տվյալներ հայտնել' պատճառաբանելով, թե դա վաղուց է ձեռք բերվել, չի հիշում: Թերթը սակայն նշում է, որ մեքենան չէր կարող վաղուց ձեռք բերվել և ՍԴ ավտոպարկում պիտի հայտնված լինի վերջին ամիսներին: Առուշան Հակոբյանը, սակայն, հաստատ է ասել, որ այդ ավտոմեքենան ձեռք է բերվել պետական միջոցներով, այսինքն' հարկատուների փողերով: Այսպիսով, սակայն, կարծում ենք' հարկատուները մեծ վնաս չեն կրել, որովհետև ՍԴ-ն և նրա նախագահ Գագիկ Հարությունյանը այնքա՜ն վնաս են տվել Հայաստանի Հանրապետությանն ու նրա քաղաքացիներին, որ 150 հազար դոլար էսկողմ, 150 հազար դոլար էնկողմ՝ ֆընդըխ բաներ են: Բայց որ ՍԴ նախագահը դիմապակուն ԱՊՊԱ կտրոն չի կպցնում, լավ չի:

«Մեր թերթի հաջորդ համարը լույս է տեսնելու մարտի 13-ին, ու եթե մինչև էդ օրը ԱՊՊԱ-ն կպցրած չեղավ, էն ժամանակ նոր էդ թեմայով կխոսենք ավելի մանրամասն: Չնայած' կեղծված նախագահական և խորհրդարանական ընտրություններ լեգիտիմացրած Գագիկ Հարությունյանի համար ԱՊՊԱ չկպցնելը ի՞նչ է որ: Խնդիրն այստեղ ուրիշ բան է. արդյո՞ք ոստիկանության պետ Վովա Գասպարյանը Սահմանադրական դատարանի նախագահի մեքենայի վրա ԱՊՊԱ կպցնելու ուղղությամբ միջոցներ կձեռնարկի, և ԱՊՊԱ չկպցրած վարորդին կտուգանի, և արդյո՞ք էս անգամ էլ է Հայկ Գևորգյանի ավտոյի տակ մարդ «ընկնելու»: Երեկ, ի դեպ, Աշոտ Ֆրանգուլյանի ճիխկիլները հանած մեքենան վերադարձրել են խմբագրությանը: Համ էլ՛ շնորհավոր մարտի 8-ը, սիրելի կանայք»,- գրում է թերթը: