«Չորրորդ ինքնիշխանություն». Սերժ Սարգսյանն անձամբ է կոորդինացնելու ընտրությունների կեղծման գործընթացը

Սերժ Սարգսյանն ու նրա ենթակայության տակ «քաղաքականությամբ զբաղվող» տարբեր տրամաչափի անհատներ առավոտից իրիկուն հայտարարում են, թե վերջին 20 տարվա կտրվածքով այս ընտրություններն աննախադեպ ազատ, արդար ու թափանցիկ են լինելու: Ակամայից այսպիսի հայտարարություններից հետո հարց է առաջանում՝ ի՞նչ է, քաղաքական մեծամասնություն ունեցող ՀՀԿ-ն որոշել է այլևս ներկայացված չլինել խորհրդարանում: Ինչո՞ւ է այսպիսի հարց առաջանում, որովհետև եթե ընտրությունները կազմակերպվեն այս երեք սկզբունքների տիրույթներում, ապա ՀՀԿ-ականներին կմնա դառնալ ընդդիմություն և պայքարել իշխանության գալու համար: Բնականաբար, այսպես չի լինելու, ըստ այդմ՝ ընտրությունները չեն լինելու ազատ, արդար և թափանցիկ:Սա փաստ է, և փաստ է նաև այն, որ երկու ամսից հետո կայանալիք խորհրդարանական ընտրություններն,իսկապես, տարբերվելու են նախորդ բոլոր ընտրություններից: Փորձենք որոշակի ուրվագծերով խոսել այն ամենի մասին, որոնք տարբերակում են դնելու այս և մինչև հիմա անցկացված ընտրությունների միջև: Եվ այսպես՝

«ՉԻ» տեղեկություններով Սերժ Սարգսյանը խստորեն զգուշացրել է ընտրությունների կազմակերպչական աշխատանքներով զբաղվող կրիմինալ շրջանակներին այս անգամ լրագրողներին չծեծել ու չահաբեկել, դիտորդներին չփորձել թունավորել, ընդդիմության վստահված անձերին տեղամասերում անսահմանափակ լիազորություններ տալ և աշխատել նրանց ջերմ ու սիրալիր լինել, և այդպիսի բարի մթնոլորտ ապահովել բոլոր ընտրատեսղամասերում:

«ՉԻ» տեղեկություններով Սերժ Սարգսյանը խստորեն հրահանգ է տվել չմտածել լցոնումների և «Կարուսելի» մասին, բայց առանց այդ տեխնոլոգիաների կիրառման՝ ապահովել ՀՀԿ-ի համար ձայների ստատիկ բազա բոլոր ընտրատարածքներում: Այս ամենը իրականացվելու է գումար բաժանելու, այսինքն' ընտրակաշառք տալու հաշվին: Բայց ոչ միայն դրա հաշվին:

«ՉԻ» տեղեկություններով Երևանի բոլոր համայնքներում ՀՀԿ շտաբի պետեր են նշանակվելու տվյալ համայնքների ղեկավարները, այսինքն' թաղապետերը: Այն մարդիկ, որոնք առաջադրվելու են Սերժ Սարգսյանի «դաբրոյով» անձնական գումարներն են ծախսելու ոչ միայն իրենց, այլ նաեւ կուսակցությանը ձայն բերելու համար: Ասել է թե' թաղապետերը, ինչպես նաև ՀՀԿ-ից առաջադրվողները ընտրակաշառք են բաժանելու սեփական գրպաններից: Սեփական գրպանը թաղապետերի պարագայում համայնքային բյուջեն է, իսկ մեծամասնականով առաջադրվածների դեպքում' էլի խոսք է գնում հարկատուներից և պետությունից գողացած գումարների մասին:

«ՉԻ» տեղեկություններով Սերժ Սարգսյանի կոորդինացմամբ ձևավորվել կամ մոտ օրերս ձևավորվելու է 3000-4000 հոգուց բաղկացած շրջիկ խումբ: Խմբի անդամները քվեարկելու են բոլոր համայնքների, Երևանի դեպքում' 13 ընտրատարծքների տարբեր տեղամասերում: Նրանք ընդգրկված են լինելու տարբեր համայնքների ընտրացուցակներում: Այսինքն' կարողանալու են քվեարկել Ավան, Արաբկիր, Կենտրոն, Աջափնյակ, Շենգավիթ, Էրեբունի, Նորք-Մարաշ, Մալաթիա-Սեբաստիա, Քանաքեռ-Զեյթուն, Դավիթաշեն համայնքներում: Օրինակը ներառում է Երևանը. նույն պատկերն է լինելու նաև մարզերի կտրվածքով:

«ՉԻ» տեղեկություններով շրջիկ խմբի անդամների գրանցումը տարբեր համայնքների տարբեր հասցեների վրա արդեն սկսված է: Մասնավորապես Կենտրոն համայնքն ընդգրկող թիվ 9 և 10 ընտրատարծքները ներառող հատվածներում արդեն սկսվել է տարբեր հասցեների վրա մարդկանց գրանցումը: Ի դեպ' 2007 թվականին թիվ 9 ընտրատարծքում արձանագրվել էր դեպք, երբ քաղաքացին գնացել էր քվեարկության և ընտրացուցակում հայտնեբերել էր, որ իր հասցեի վրա գրանցված են ևս 8 հոգի: Քաղաքացին փորձել էր հասկանալ, թե ովքե՞ր են այդ մարդիկ և ինչո՞ւ են գրանցված իր տան վրա, սակայն տեղամասից նրան դուրս էին հրավիրել' ասելով, թե դու ընտրել ես' գնա, մնացած թյուրիմացությունները հանձնաժողովը կլուծի:

«ՉԻ» տեղեկություններով համատիրությունների ղեկավարներին Կենտրոն համայնքում հանձնարարվել է գտնել «անտեր» հասցեներ և հենց դրանց վրա էլ գրանցել «շրջիկ խմբի» անդամներին: «Անտեր» հասցե են համարվում նրանք, որտեղ մարդիկ գրանցված են, բայց ապրողներ չկան, այսինքն' տվյալ հասցեի բնակիչները լքել են հանրապետության տարածքը կամ ինչ-ինչ այլ պատճառներով չեն ապրում այդտեղ:

Ընտրությունների կեղծման տեխնոլոգիաների մասին «ՉԻ»-ն շարունակաբար հանդես կգա հրապարակումներով: Այս պահին ֆիքսենք երեք տեխնոլոգիա, որոնք օգտագործելու է Սերժ Սարգսյանը ազատ, արդար և թափանցիկի ընտրություններ անցկացնելու համար.

1. «Շրջիկ խմբերի» ստեղծում,

2. կեղծ գրանցումներ հիմնականում«անտեր» հասցեներում,

3. ընտրակաշառքի բաժանում' աննախադեպ բարձ «ստավկաներով»: