Ի՞նչ նվերներ են ստացել հայ աստղերը՝ Մարտի 8-ի կապակցությամբ

Մարտի 8-ը ողջ աշխարհում նշվում է որպես Կանանց միջազգային օր: Լուրեր.com-ը հայ աստղերից փորձեց պարզել, թե ինչ հիշարժան նվերներ են ստացել նախորդ տարիներին այս օրը և ինչպես են պատրաստվում նշել Մարտի 8-ն այս տարի:

Երգչուհի Նունե Եսայանը չհիշեց, թե որն է եղել իր համար ամենաթանկ նվերը, բայց նշեց. «Ինքս շատ նվերներ եմ պատրաստել մտերիմներիս համար: Բայց ինքս, այնքան էլ չեմ ուրախանում նվեր ստանալուց, որքան՝ տալուց»:

Իսկ ահա Empyray խմբի երաժիշտ Գիսանե Պալյանն ուրախութամբ ասաց, որ իր համար ամենամեծ նվերը համարում է իր երեխաների ծնունդը, իսկ Մարտի 8–ի նվերներից սիրում է և՛ ստանալ, և՛ նվիրել ծաղիկներ, բայց հողի մեջ:

«Աշխատում եմ յուրահատուկ բաներ նվիրել: Կարևորում եմ ուշադրությունը»,-ասաց նա՝ հավելելով, որ  իր համար ամենաթանկը իր երեխաների կողմից ձևավորված բացիկներն են։

«Շատ եմ սիրում ստանալ երեխաներիս կողմից, իրենց ձեռքերով ձևավորած բացիկեր: Ինձ համար կարևոր է այն աշխատանքը, ջանքը, որ թափել են, ինչ-որ բան են պատրաստել»,- ասաց նա։

Շնորհավորելով կանանց միջազգային օրվա առթիվ՝ Գիսանե Պալյանն ավելացրեց.« Ես կցանկանայի, որ կանանց տոն լիներ ամեն օր, որպեսզի տղամարդիկ ուշադիր լիենն, սիրեն, նվերներ նվիրեին կանանց ամեն օր, ոչ թե մեկ օր կամ մեկ ամիս: Մաղթում եմ մեր կանանց կանացի երջանկություն, շատ երեխաներ ու որ միշտ սիրեն և լինեն առողջ»:

Երգչուհի Նադեժդա Սարգսյանն էլ, շնորհավորելով կանանց, «լավ և ուրախ տարի, շատ նվերներ» ցանկացավ և ավելացրեց, որ ինքն այս տարի ոչ մեկի համար նվերներ չի պատրաստել:

Իսկ ահա երգչուհի Սոֆի Մխեյանը, չհիշելով իր ստացած լավագույն նվերը, ասաց, որ այս տարի պատրաստել է իր յուրահատուկ նվերը բոլոր Մայրերին:

«Հիմա դժվարանում եմ հիշել, թե ինչ եմ ստացել, բայց երբեք ուշադրությունից դուրս չեմ եղել, և ինքս փորձել եմ ամեն ինչ անել՝ հետաքրքիր նվեր մատուցելու համար, որ իմ շրջապատի մարդկանց մոտ մնան միայն լավ հիշողություններ: Այս տարի, հենց մարտի 8-ին տեսահոլովակ կհայտնվի եթերում, մեր կյանքի ամենաթանկ էակները՝ մամաները լինեն երջանիկ»: